Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 591 Hüküm no: 760 Orijinal metin no: [115a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Kiko’nun ev hissesini Koçu v. Kiko’ya satması Vilâyet-i Rumeli’nde Ergirikasrı kazâsına tâbi‘ Doksat nâm karye ahâlîsinden Yani v. Kiko nâm zimmî meclis-i şer‘-i şerîfde li ebeveyn er karındaşı işbu râfi‘ü’r-rakīm Koçu v. Kiko nâm zimmî muvâcehesinde ikrâr ve takrîr-i kelâm edip akd-i âtî sudûruna değin ale’l-iştirâki’s-seviy silk-i mülkümüzde münselik olup karye-i mezbûrede vâki‘ bir tarafı Dimo nâm zimmî mülkü ve bir tarafı bâyi‘-i mezbûrun âhar mülkü ve bir tarafı dere ve bir tarafı tarîk-i âm ile mahdûd üç bâb fevkānî odaları ve zât-ı eşcâr-ı müsmire ve gayr-ı müsmire iki kıt‘a bahçeyi müştemil mülk menzilde olan nısf hisse-i şer‘iyye-i şâyi‘amı cemî‘ tevâbi‘ ve levâhıkı ile mezbûr Koçu’ya iki bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr iki bin akçeyi karındaşım mezbûr Koçu yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda olan nısf hisse-i şer‘iyye-i şâyi‘amda alâka ve medhalim kalmadı mecmû‘-ı menzil irsen ve şirâen mezbûr Koçu’nun mülk-i müşterâsı olmuşdur keyfe mâ yeşâ’ nısf hisseyi mahallinde zabt ve tasarrufa mezbûr Koçu’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Hüseyin Çelebi b. Ali, Mehmed b. Eyüb, Mehmed b. Mahmud, Ali b. İslâm, Kiko [v.] Dimo, Frede [v.] Göka, Tanaş [v.] Dado, Dimo [v.] Sava.