Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 592 Hüküm no: 761 Orijinal metin no: [115a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beço’nun oğulları Dado ve Hristo’nun evlerini Kika v. Doşe’ye satmaları Vilâyet-i Rumeli’nde Tepedelen kazâsına tâbi‘ Tebvan? nâm karye ahâlîsinden olup kendi asâleten ve li ebeveyn er karındaşları Dado ve Hristo veledey Beço zimmîler taraflarından husûs-ı âti’l-beyânı ikrâra vekîl olup nehc-i şer‘î üzre vekâleti şer‘an sâbite olan Koçi nâm zimmî meclis-i şer‘-i şerîfde işbu râfi‘ü’r-rakīm Kika v. Doşe nâm zimmî muvâcehesinde bi’l-asâle ve bi’l-vekâle ikrâr ve takrîr-i kelâm edip akd-i âtî sudûruna değin ale’l-iştirâki’s-seviy silk-i mülk-i sahîhimizde münselik olup karye-i mezbûrede vâki‘ bir tarafı Beço [v.] Neva nâm zimmî mülkü ve bir tarafı Koçu [v.] Dado nâm zimmî mülkü ve bir tarafı Koçu [v.] Manko nâm zimmî mülkü ve bir tarafı tarîk-i âm ile mahdûd bir bâb fevkānî oda ve altında ahır ve bir samanlık ve iki bostan yeri ve harman yeri müştemil mülk menzili cemî‘ tevâbi‘ ve levâhıkı ile mezbûr Kika’ya iki bin sekiz yüz fıddî râyic fi’l-vakt akçeye asâleten ve vekâleten tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni meblağ-ı mezbûr iki bin sekiz yüz akçeyi mezbûr Kika yedinden bi’t-tamâm ahz ve kabz eyledik ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalimiz yokdur, mezbûr Kika[’nın] mülk-i müşterâsı olmuşdur keyfe mâ yeşâ’ mahallinde zabt ve tasarrufa mezbûr Kika’yı taslît eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’s-seneti’l-mezbûre. Şuhûdü’l-hâl: Es-Sâbikūn, Dado [v.] Yano, Andriye [v.] (…) Vasil [v.] Doşe, Kika [v.] Rali?.