Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 592 Hüküm no: 762 Orijinal metin no: [115a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mustafa’nın evini Receb Ağa b. Abdullah’a satması Medîne-i Hazret-i Ebâ Eyyûb el-Ensârî -dâme rıdvânü’l-Bârî-’de Çavuş Kasım mahallesinde sâkin Mehmed Çelebi b. Mustafa nâm kimesne meclis-i şer‘-i şerîfde işbu râfi‘ü’l-kitâb fahrü’l-eşbâh Receb Ağa b. Abdullah tarafından ikrâr-ı âti’l-beyânı tasdîke vekîl olup Ali Çelebi b. Sefer ve diğer Ali Bey b. Receb nâm kimesneler şehâdetleri [ile] şer‘an vekâleti sâbite olan diğer Receb Bey b. Mahmud mahzarında ikrâr u i‘tirâf edip akd-i âtî sudûruna değin silk-i mülk-i [115b] sahîhimde münselik olup mahalle-i mezbûrede vâki‘ bir tarafı Mehmed b. Ahmed mülkü ve bir tarafı ba‘zan Hasan Efendi mülkü ve ba‘zan Emine Hâtun vakfı ve iki tarafı tarîk-i âm ile mahdûd üç bâb fevkānî ve bir bâb tahtânî odaları ve bi’r-i mâ ve eşcâr-ı müsmire ve gayr-ı müsmire bahçe ve kenîfi ve iki sokak kapısını müştemil mülk menzilimi cemî‘ tevâbi‘i ile müvekkil-i mezbûr Receb Ağa’ya yirmi sekiz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr yirmi sekiz bin akçeyi müvekkil-i mezbûr Receb Ağa yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur, müvekkil-i mezbûr Receb Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şevvâli’l-mükerrem fi’s-seneti’l-mezbûre. Şuhûdü’l-hâl: Mehmed Efendi b. Mustafa İmâm, Mustafa Çelebi b. Mehmed, Mehmed Beşe b. Abdullah, Hasan b. Abdullah, Mehmed b. Eyüb, Nasuh b. Abdüsselâm, Ali b. İslâm.