Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 596 Hüküm no: 768 Orijinal metin no: [116b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsa Dede v. Evhad’ın menzilini vakf etmesi Mâ hüve’l-muharrer min asli’l-vakf ve’ş-şurût sahha ledeyye ve hakemtü bi sıhhatihî ve lüzûmihî âlimen bi mevâzi‘i’l-hilâf ve mürâ‘iyyen li mâ yecibu i‘tibâruhû fi’l-kazâ bi’l-vifâk ve ene abdü’l-fakīr Ahmed b. İbrahim el-Kassâmü’l-askerî bi Havâss-ı Kostantıniyye el-mahmiyye hilâfeten -Ufiye anhümâ- Elhamdülillâhi Rabbi’l-âlemîn ve’s-salâtü alâ resûli Muhammed seyyidi’l-mürselîn ve alâ âlihî ve sahbihî et-tayyibîni’t-tâhirîn ammâ ba‘d sebeb-i tahrîr-i kitâb-ı sıhhat budur ki Dârü’s-saltanati’s-seniyye Kostantıniyye el-mahmiyye civârında Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Kiremitçi Süleyman Çelebi mahallesi sâkinlerinden sâhibü’l-hayrât ve’l-hasenât ve râgıbü’s-sadakāt ve’l-meberrât İsa Dede b. Evhad meclis-i şer‘-i hatîr-i lâzımü’t-tevkīrde vakf-ı âti’z-zikrde li ecli’t-tescîl hasbî mütevellî nasb olunan Bayram Efendi b. Şükrullah mahzarında bi’t-tav‘i’s-sâf ikrâr ve i‘tirâf edip silk-i mülkümde mahmiye-i mezbûrede vâki‘ bir tarafı Musa Efendi b. Derviş mülkü ile bir tarafı merhûme Râbia Hâtun bt. Bâli vakfı ile ve bir tarafı Âsiye Hâtun vakf eylediği menzile ve taraf-ı âharı tarîk-i âm ile mahdûd ve mümtâz olup iki bâb fevkānî evleri ve altında ahırı ve iki sofayı ve kenîfi ve zât-ı eşcâr-ı müsmire ve gayr-ı müsmireyi müştemil muhavvatayı cemî‘ tevâbi‘ ve levâhıkı ile hasbeten lillâhi’l-aliyyi’l-azîm ve taleben li merzâti Rabbi’l-kerîm vakf ve haps edip şöyle şart eyledim ki kendim hayâtda oldukça menzil-i mârrü’z-zikrde sâkin olam ve tebdîl ve tağyîri kendi yedimde ola vefâtımdan sonra menzil-i merkūmun süknâsı sulbiye evlâdıma ve evlâd-ı evlâdıma meşrûta ola ba‘de’l-inkırâz -el-iyâzü billâhi min kahri’l-meliki’l-Feyyâz- hâlâ taht-ı nikâhımda zevcem olan Zamâne bt. Abdullah nâm hâtunum sâkine ola ve ba‘dehû vefâtından sonra evlâd ve evlâd-ı evlâdına ile’l-inkırâz sâkin olalar anlar fevt oldukdan sonra akrabâmdan Ahmed b. İbrahim nâm kimesneye meşrûta ola anlar sâkin olalar vefâtından sonra evlâdına ve evlâd-ı evlâdına ile’l-inkırâz sâkin olalar ve ba‘dehû akrabâmın süknâsı olmayıp süknâya muhtâc olan kimesneler sâkin ola ve ba‘dehû evlâd-ı evlâdları sâkin olalar ve ba‘dehû zühd ve takvâ ile ma‘rûf diyânet ve salâh ile mevsûf sulehâdan bir recül-i sâlih kimesneye verile süknâsı hâlinde her gün üç İhlâs-ı şerîf ve bir Fâtiha tilâvet edip sevâbını rûhuma ihdâ eyleye her kim menzil-i merkūmda sâkin ola her gün üç İhlâs-ı şerîf ve bir Fâtiha okuyup sevâbını rûhuma hibe eyleyeler ve merhûm Zal Mahmud Paşa câmi‘-i şerîfi’nde her kim imâm olursa menzil-i merkūmun üzerine nâzır ola ve ba‘dehû vâkıf-ı mezbûr menzil-i mesfûru mütevellî-i mezkûr Bayram Efendi’ye teslîm edip ol dahi vakıf olmak üzre tesellüm ve kabz ve kabûl ettikden sonra vâkıf-ı müşârün-ileyh inân-ı azîmeti semt-i âhara masrûf ve zamân-ı himmetini taraf-ı gayra ma‘tûf [hâkim-i] muvakki‘-i sadr-ı kitâb tûbâ-lehû ve hüsnü me’âb huzûrunda mütevellî-i mezbûr ile muhâsama ve münâza‘a ve mu‘âraza ve mürâfa‘aya şürû‘ edip eğerçi vakf-ı akār eimme-i mezheb-i muhtârdan Hazret-i İmâm-ı A‘zam ve hümâm-ı efham Ebû Hanîfe el-Kûfî -cûziye bi’l-hayr ve kûfiye- katında sahîhdir lâkin vakıf lâzım olmadığı ecilden tarîk-i vakf sed ve yine mülküme reddolunmasın taleb ederim deyicek mütevellî-i merkūm istintâk olundukda cevâb-ı bâ savâba mütesaddî olup eğerçi vakf-ı akār İmâm-ı Züfer katında vakıf lâzım değildir lâkin şemseyn-i fahreyn-i bedreyn-i münîreyn imâmeyn-i hümâmeyn İmâm Muhammed eş-Şeybânî ve İmâm Ebû Yusuf eş-şehîr bi’l-İmâmi’s-Sânî katlarında sıhhat lüzûmdan müfârık olmayıp ale’l-husûs hükm-i hâkim müslim-i? müctehidîn fihâda vâki‘ olmağla vakıf lâzım olduğu ecilden imâmeyn-i muhteremeyn kavilleri üzre vakf-ı mezbûrun lüzûmuna hüküm taleb ederim deyicek hâkim-i müşârün-ileyh -lâ-zâle müşârün-ileyh- dahi tarafeynin kelâmını ısgā ve cânib-i vakfı evlâ görüp imâmeyn-i şerîfeyn kavilleri üzre vakf-ı mezbûrun sıhhat ve lüzûmuna hükm edicek vakıf sahîh ve lâzım olup min ba‘d nakz u nakīzine mecâl muhâl olundu. Hurrire fî evâili Receb sene ihdâ ve tis‘în ve elf. Şuhûdü’l-hâl: Mehmed Çelebi b. Abdurrahman el-İmâm, Veli Halîfe b. Abdünnebi, Mehmed Çelebi b. Ferruh, Ahmed Halîfe b. İbrahim, Receb Efendi b. Abdi, Mustafa b. Davud, Osman Halîfe b. Ömer, Ahmed Çelebi b. Ömer el-Kâtib, Ahmed Çelebi b. Mehmed, Hasan Halîfe b. Abdi el-İmâm ve gayruhüm.