Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 598 Hüküm no: 769 Orijinal metin no: [116b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Elefendo bt. Rifo’nun bazı emlâkini Todori v. Nikola’ya satıp bazılarını da devretmesi Vilâyet-i Rumeli’nde Kalavrita kazâsına tâbi‘ Grebini nâm karye sâkinelerinden Elefendo bt. Riko nâm nasrâniyye meclis-i şer‘-i şerîfde yine kazâ-i mezbûrede Visoçe nâhiyesine tâbi‘ Ahter nâm karye sükkânından işbu râfi‘ü’r-rakīm Todori v. Nikola nâm zimmî muvâcehesinde bi tav‘ihâ ikrâr ve takrîr-i kelâm edip akd-i âtî sudûruna değin yedimde mülküm ve hakkım olup karye-i mezbûrede vâki‘ bir tarafı Kostantin nâm zimmî mülkü ve bir tarafı dere ve bir tarafı zikr-i âtî tarla ve bir tarafı tarîk-i âm ile mahdûd bir bâb fevkānî ve bir bâb tahtânî odaları ve harman yerini müştemil mülk-i mevrûs menzilimi cemî‘ tevâbi‘i ile ve içinde mevcûd iki fıçı ve bir şırahâne ve beynimizde ma‘lûm ism-i mâl ıtlâk olunur kalîl ve kesîr eşyâyı ve yine karye-i mezbûre hudûdu dâhilinde vâki‘ her birinin hudûdu beynimizde ma‘lûm yedi kıt‘a mülk-i mevrûs bağlarımı dahi cemî‘ tevâbi‘i ile ve otuz dib dut ağacı ve beynimizde ma‘lûm ceviz ağacında olan sekiz sehim hissede olan bir sehim hissemi mezbûr Todori’ye bi safkatin vâhidetin elli esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra yine tefvîz-i âtî sudûruna değin zabt ve taht-ı tasarrufumda olup yine karye-i mezbûrede vâki‘ her birinin hudûdu beynimizde ma‘lûm eşcâr-ı müsmire ve gayr-ı müsmireyi müştemil yedi kıt‘a tarlalarımın dahi hakk-ı tasarruflarını sâhib-i arz ma‘rifetiyle kezâlik mezbûr Todori’ye on esedî guruş bedel mukābelesinde tefvîz bi’l-ferâğ edip ol dahi tefevvuz ve kabûl eyleyip semen-i mezbûr bedel-i merkūm cem‘an altmış esedî guruşu mezbûr Todori yedinden bi’t-tamâm ahz ve kabz eyledim ba‘de’l-yevm emlâk-i mezbûr ve eşyâ-i merkūmede alâka ve medhalim yokdur, mezbûr Todori’nin mülk-i müşterâsı ve arâzi-i merkūme dâhil-i taht-ı tasarrufu olmuşdur keyfe mâ yeşâ’ mahallinde zabt ve tasarrufa mezbûr Todori’yi taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn fî seneti’l-mezbûre Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Ali b. İslâm, Yanaki [b.] Tanaş, Panayot [b.] Todori, İstati [b.] İstahi, Yani [b.] Kostantin, Angeli [b.] Yani, Todori [b.] Dimo, Nikola [b.] Dimo.