Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 394 Hüküm no: 458 Orijinal metin no: [62b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Ali’nin, evini Mustafa Ağa’ya sattığı Havâss-ı aliye kazâsı müzâfâtından kasaba-i Silivri’de Ali Bey mahallesi ahâlîsinden olup dergâh-ı âlî yeniçerilerinden kırk altıncı cemâ‘ata mahsûs oda yoldaşlarından Mehmed Beşe b. Ali nâm kimesne meclis-i şer‘-i şerîf-i lâzımü’t-teşrîfde sâbıkan yeniçeri kethüdâsı olan umdetü’l-emâcid ve’l-ekârim câmi‘ü’l-mehâmid ve’l-mekârim bâ‘isü’l-kitâb Mustafa Ağa tarafından husûs-ı âti’l-beyâna vekîl olduğu Mehmed Odabaşı b. İbrahim ve Tevekkül? Hasan Beşe b. Mustafa nâm kimesneler şehâdetleri ile şer‘an sâbit olan Ahmed Çorbacı b. Mustafa mahzarında ikrâr ve takrîr-i kelâm edip emîn-i beytülmâlden iştirâ etmekle mülküm olup mahalle-i mezbûrda vâki‘ bir tarafdan İbrahim Çelebi mülkü ve bir tarafdan Köseoğlu ve diğer İbrahim mülkü ve bir tarafdan mer‘â ve bir tarafdan tarîk-i âm ile mahdûd üç bâb fevkānî oda ve iki sofa ve bir ahır ve bir anbar ve bir kuyu ve bir fırın ve bahçeyi müştemil menzilimi bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr Mehmed Çorbacı’ya tarafeynden îcâb ve kabûlü hâvî bey‘-i bât ile yirmi bin altı yüz akçeye bey‘ ol dahi müvekkili mûmâ-ileyh Mustafa Ağa için iştirâ ve kabûl edip semen-i mezbûru yedinden tamâmen alıp kabz eylediğimden sonra mebî‘-i mezbûru mahallinde kabzına tarafımdan mezbûr Ahmed Çorbacı’yı taslît eyledim ba‘dehû menzil-i mezbûr müvekkil-i mûmâ-ileyh Mustafa Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ [63a] ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Umdetü’l-emâsil ve’l-a‘yân Mehmed Ağa Ağa-yı İstanbul, fahrü’l-eşbâh Mustafa Ağa, Mehmed Ağa b. İbrahim Emîn-i beytülmâl, Mehmed Beşe b. Ser-oda, Ali Beşe b. Hüseyin.