Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 394 Hüküm no: 459 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedi Süleyman b. Abdullah daha önceki hanımı Harsandi’nin aldığı borca karşı rehin verdiği eşyalar ile ilgili davasının reddi Mahmiye-i İstanbul’da Abdi Subaşı mahallesinde sâkin Süleyman b. Abdullah nâm mühtedî meclis-i şer‘-i şerîfde Yahud tâifesinin Karaferye cemâ‘atinden bâ‘isü’s-sifr Menahem v. Yasef nâm Yahudi mahzarında üzerine da‘vâ ve takrîr-i kelâm edip bundan akdem hâl-i küfrümde zevcem olan Harsandi nâm nasrâniye zevcem iken eşyâ-i memlûkesinden yüz otuz beş dâne Hürmüz inci ve dokuz bin akçe kıymetli bir hâtem ve doksan dirhem sîmden masnû‘ bir buhurdân ve beş guruş kıymetli bir serâser çintiyân ve on guruş kıymetli bir serâser ma‘sûm kerekesi ve yedi miskāl altından masnû‘ bir kutu ve beş guruş kıymetli bir çift incili altın küpe ve yirmi guruş kıymetli on zirâ‘ sarı atlas medîne-i Ebî Eyyûb’da ( ) vakfı mütevellîsi iken vefât eden Ahmed Ağa’dan hayâtında ikrâz ve kabz ettiği yüz kırk esedî guruş mukābelesinde rehin verdikde eşyâ-i mezbûreyi mezbûr Harsandi’nin emri ile mezbûr Ahmed Ağa’ya ben teslîm ettiğimden sonra mezbûr Ahmed Ağa dahi fuzûlen mezbûr Menahem’e verip ol dahi kabz ve istihlâk eylemeğin suâl olunup eşyâ-i mezbûreyi merkūm Ahmed Ağa’ya vech-i mübeyyen üzre bize teslîm etmekle eşyâ-i mezbûrun misli olanın misli, kıymeti olan kıymetini bana teslîme mezbûr Menahem’e tenbîh olunmak matlûbumdur dedikde müdde‘î-i mezbûrun da‘vâ-yı meşrûhası mesmû‘a olmayıp mezbûr Menahem’e suâl dahi teveccüh etmemeğin müdde‘î-i mezbûr vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin aşer min Recebi’l-ferd li sene seb‘a ve seb‘în ve elf. Şuhûdü’l-hâl: Umdetü’l-müderrisîn es-Seyyid Ahmed Efendi b. ( ), es-Seyyid Ahmed Çavuş b. Mustafa, Mehmed Çelebi b. ( ), İbrahim Çelebi b. Ahmed.