Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 37 Hüküm no: 2 Orijinal metin no: [1a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Abdullah’ın terekesinden vârislerinin hisselerini aldıkları Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Düğmecibaşı mahallesinde sâkin iken bundan akdem vefât eden el-Hâc Mustafa b. el-Hâc Abdullah’ın verâseti zevce-i menkûha-i metrûkesi Fâtıma Hatun bt. Veliyüddin ile babası el-Hâc mezbûr Abdullah ve sulbî oğulları Ali ve Mehmed Emin ve Mes‘ud ve sulbiye kebîre kızı diğer Fâtıma’ya münhasıra ve tashîh-i mes’elesi yüz altmış sekiz sehimden olup sihâm-ı mezbûrdan yirmi bir sehmi zevcesi mezbûre Fâtıma Hatun’a ve yirmi sekiz sehmi babası mezbûr el-Hâc Abdullah ve otuz dörder sehmi sagīrûn-ı mezbûrûn Ali ve Mehmed Emin ve Mes‘ud’a ve on yedi sehmi kızı mezbûre Fâtıma’ya isâbeti tahkīkinden sonra [da‘]vâlarını es-Seyyid Yahya b. Veliyüddin ve Ahmed Çelebi b. Abdullah ta‘rîfleriyle mu‘arrefe olan mezbûretân Fâtıma ve diğer Fâtıma ve el-Hâc Abdullah nâm kimesneler meclis-i şer‘-i şerîf-i enverde müteveffâ-yı mezbûrun terekesine bi’l-vesâye vâzı‘u’l-yed olan işbu râfi‘u’l-kitâb Veli Çelebi b. Ali mahzarında ikrâr ve takrîr-i kelâm edip mûrisimiz müteveffâ-yı mezbûrun terekesi tahrîr ve ba‘de ihrâci’l-masârıf ve’d-düyûn ber-mûceb-i defter-i kassâm-ı askerî tashîh-i mezbûre üzere otuz iki bin altı yüz yetmiş akçesi vasiyy-i mezbûr Veliyüddin Çelebi bize def‘ ü teslîm biz dahi alâ-kadri’l-hısas yedinden her birimiz alıp kabz edip vasiyy-i mezbûr Veliyüddin Çelebi zimmetinde ve yedinde meblağ-ı mezbûrdan bir akçe ve bir habbe hakkımız bâkī kalmayıp husûs-ı mîrâsa müte‘allıka âmme-i da‘vâdan vasiyy-i mezbûr Veliyüddin Çelebi’nin zimmetini her birimiz ibrâ-i âmm-ı kātı‘u’n-nizâ‘ ile ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’s-sânî min-Ramazâni’l-mübârek sene 1129 Şuhûdü’l-hâl: eş-Şeyh es-Seyyid Hüseyin Efendi b. es-Seyyid Şükrullah Efendi, Mustafa Efendi b. Hüseyin, es-Seyyid Mustafa b. Sefer, Ali Çelebi b. Abdulbâki.