Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 42 Hüküm no: 7 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan oğlu Ali Ağa’ya ait evin zevcesine devri Husûs-ı âti’l-beyânın mahallinde ketb ü tahrîri iltimâs olunmağın bu fakîr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçibaşı Süleyman Ağa mahallesinde sâkin iken bundan akdem vefât eden Ali Ağa b. Hasan nâm sagīrin hayâtında sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûr Ali Ağa’nın verâseti zevce-i menkûha-i metrûkesi Emetullah bt. İbrahim Ağa sagīre ile ve li-ebeveyn kız karındaşı Âişe nâm hatun ile asabe-i nesebiyyelerinden gāib ani’l-beled Mehmed Ağa b. Ebubekir nâm kimesneye münhasıra ve tashîh-i mes’elesi dört sehimden olup sihâm-ı mezbûreden bir sehmi zevcesi sagīre-i mezbûre Emetullah’a ve iki sehmi kız karındaşı mezbûre Âişe Hatun ve bir sehmi gāib-i mezbûr Mehmed Ağa’ya isâbet ve tahakkukundan sonra sagīre-i mezbûre Emetullah’ın tesviye-i umûruna kıbel-i şer‘den mansûb vasîsi olan mezbûr İbrahim Ağa b. Mehmed meclis-i ma‘kūd-ı mezkûrda işbu râfi‘u’l-kitâb müteveffâ-yı mezbûrun kız karındaşı mezbûre Âişe Hatun tarafından tasdîka vekîli olup vekâleti nehc-i şer‘î üzere sâbit olan zevci Mehmed Ağa b. ( ) mahzarında ikrâr-ı [3a] tâm ve takrîr-i kelâm edip işbu müteveffâ-yı mezbûrun terekesinden olup mahalle-i mezbûrda vâki‘ bir tarafdan ba‘zan Osman Efendi mülkü ve ba‘zan el-Hâc Hüseyin mülkü ve bir tarafdan Kazcızâde veresesi mülkleri ve ba‘zan Mehmed Çelebi mülkü ve bir tarafdan ba‘zan Alîme Hatun oğulları mülkleri ve ba‘zan el-Hâc Ali Ağa mülkü ve bir tarafdan tarîk-ı âm ile mahdûd dâhiliyyesinde bir bâb tahtânî oda ve bir sofa oda ve bir taş oda ve tahtında bir mahzen ve bir hamâm ve bir câmekân ve bir matbah ve üstünde bir oda ve kapı üstünde iki bâb fevkânî oda ve bir köşk ve yine kapı dâhiliyyesinde bir bâb tahtânî oda ve bir kiler ve bir matbah ve kenîf ve bahçe ve hâriciyyesinde bir bâb fevkânî oda camlı ve bir köşk ve bir kahve odası ve bir sofa ve zât-ı eşcâr-ı müsmire ve gayr-ı müsmire ve bahçe ve dâhiliyyesinde bir camlı köşk ve havuz fıskiyesi müştemil mülk menzil kâbil-i taksîm olmayıp bey‘i lâzım olmağın sûk-ı sultânîde ba‘de’l-müzâyede ragabât-ı nâs münkatı‘a oldukdan sonra sihâm-ı mezbûreden mezbûr Emetullah’a isâbet eden rub‘ hisse mezbûre Âişe Hatun üzerine beş yüz guruşa karâr edip ziyâde ile tâlib-i âharı gelip istememekle hisse-i mezbûresi taraf-ı şer‘den me’zûnen beş yüz guruş mezbûre Âişe Hatun’a bi’l-vesâye ve bi’l-velâye bey‘ ve teslîm ve temlîk ol dahi ber-vech-i muharrer iştirâ ve tesellüm ve temellük ettikden sonra semeni olan meblağ-ı mezbûr beş yüz guruşu müvekkil-i mezbûr Mehmed Ağa yedinden bi’l-vesâye ve bi’l-velâye ahz u kabz eyledim ba‘de’l-yevm menzil-i mahdûd-ı mezkûrdan mezbûr Emetullah’ın hissesi kal[ma]mışdır mezbûre Âişe Hatun’un mülk-i müşterâsıdır keyfemâ-yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’l-ışrîn min-Şevvâli’l-mükerrem li-sene tis‘a ve ışrîn ve mi’e ve elf Şuhûdü’l-hâl: Hüseyin Ağa b. Mehmed Ağa, Mustafa Ağa b. Mehmed, el-Hâc İbrahim Ağa b. Ali, İbrahim Çelebi b. Halil, İsmail Efendi b. el-Hâc Osman, Veli Efendi b. Ali, İsmail b. Abdullah, Süleyman Ağa b. Mehmed, el-Hâc Ömer Ağa b. Mustafa, es-Seyyid Mustafa b. Sefer, Ali Çelebi b. Abdulbâki.