Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 395 Hüküm no: 460 Orijinal metin no: [63a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nalçacı esnafının bedesten önünde nöbet için el-Hâc Ahmed’i seçtikleri Mahmiye-i İstanbul’da olan nalçacı tâifesinin ihtiyârlarından İbrahim Beşe b. Mehmed ve Ahmed Beşe b. Mustafa ve Mahmud b. Musa ve Mustafa b. Mehmed ve Yusuf b. Abdullah ve Hacı Mustafa b. Hasan ve Fethullah b. Emrullah ve Ali b. Musa ve Hüseyin b. Ramazan ve Mehmed b. Yusuf ve İbrahim Beşe b. Hamza nâm kimesneler meclis-i şer‘de tâife-i mezbûrenin hâlâ du‘âcıları olan bâ‘isü’l-kitâb el-Hâc Ahmed b. ( ) nâm kimesne mahzarında her biri takrîr-i kelâm ve ta‘bîr ani’l-merâm edip kadîmden hırfetimiz ahâlîsine kethüdâ ve yiğitbaşı ve du‘âcı ve ehl-i hibre olanlara her haftada mahmiye-i mezbûrda ikişer növbet ta‘yîn oluna gelip mezbûr el-Hâc Ahmed için haftada bezzâzistan önünde bir növbet olup gayrı yerde olmamağla mu‘tâd-ı kadîme binâen mezbûr el-Hâc Ahmed’e Tahtakal‘a çarşısında bir növbet dahi ta‘yîn eyledik mezbûr el-Hâc Ahmed’e mu‘tâd-ı kadîm üzre her haftada bir növbet bezzâzistan önünde ve bir növbet Tahtakal‘a’da işleyip içimizden kimesne mâni‘ olmamak üzre kavl ve ittifâk ve ahd-i mîsâk eyledik mezbûr el-Hâc Ahmed’in yedine hüccet verilmek matlûbumdur dedikde tâife-i mezbûr el-Hâc Ahmed’e vech-i muharrer üzre her haftada bir növbet bezzâzistan önünde ve bir növbet Tahtakal‘a’da işleyip bi gayrı vechin kimesne mâni‘ olmamak üzre taraf-ı şer‘den bu hurûf ketb olunup yedine vaz‘ ve def‘ olundu. Fi’l-yevmi’l-âşir min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çelebi b. Abdülmennân, Hasan Beşe b. ( ) Çukadâr, Mehmed b. Ramazan, Baba Resul b. Rıdvan, Hasan Çelebi b. Ahmed, Osman Çelebi b. Hasan, Baba Resul b. Rıdvan, Hasan Çelebi b. Ahmed.