Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 54 Hüküm no: 22 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim oğlu Mustafa Beşe ile ortak çiftliği olan yeğeni Halil oğlu İbrahim’in hissesini aldığı <> Husûs-ı âti’z-zikrin mahallinde ketb ü tahrîri iltimâs olmağın savb-ı enverden Mevlânâ Veliyüddin Efendi b. Ali irsâl olunup ol dahi Havâss-ı Refî‘a kazâsı muzâfâtından Terkos nâhiyesine tâbi‘ Kefeli nâm karyede sâkin iken bundan akdem vefât eden Mustafa Beşe b. İbrahim nâm kimesnenin menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i nebevî olundukda karye-i mezbûrede sâkin müteveffâ-yı mezbûrun karındaşı oğlu işbu bâ‘isü’l-vesîka İbrahim b. Halil nâm kimesne meclis-i mezkûrda müteveffâ-yı mezbûrun ümm-i veledi ve sulbî sagīr oğlu Musa’nın bâ-hüccet-i şer‘iyye vasiyyesi olan Hadice bt. Abdullah nâm hatun mahzarında ikrâr ve takrîr-i kelâm edip karye-i mezbûrede vâki‘ ale’l-iştirâki’s- [7a] seviy müteveffâ-yı mezbûr ammim Mustafa Beşe ile mutasarrıf olduğumuz lede’l-ahâlî ve’l-cîrân ma‘lûmü’l-hudûd olan çiftlik ve menzil ve bağçe ve bağ ve emlâk ve hayvanât ve buğday ve arpa ve yulaf ve sâir eşyâ ve tereke cüz’î ve küllî bana isâbet intikāl eden nısf-ı hisse-i şâyi‘amı ber-mûceb-i defter-i kassâm-ı askerî vasiyye-i mezbûre Hadice <> yedinden tamâmen ahz u kabz eyledim ba‘de’l-yevm vasiyye-i mezbûre Hadice zimmetinde bana isâbet eden nısf hisse-i şâyi‘ama müte‘allıka âmme-i de‘âvî ve mutâlebât ve muhâsamâtdan vasiyye-i mezbûrenin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’l-mu‘teber mezbûre Hadice dahi meclis-i mezkûrda mezbûr İbrahim’e mârrü’z-zikr nısf hisse-i şâyi‘asını def‘ ü teslîm eyledim deyu ikrâr eylediği husûs-ı mezbûru Mevlânâ mezbûr mahallinde ketb ü tahrîr ve ba‘de ma‘an irsâl olunan çukadâr Ali Çelebi b. Abdulbâki ve muhzır es-Seyyid Mustafa Çelebi b. Sefer meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sânî min-Zilka‘de li-sene 1129 Şuhûdü’l-hâl: Es-sâbıkūn eş-şuhûdü’s-sâbıkūn.