Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 396 Hüküm no: 461 Orijinal metin no: [63a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Osman’ın, ölen Fâtıma bt. Mustafa’nın annesi olup beytülmâldeki terekesinin yarısının kendisine verilmesi gerektiği Mahmiye-i İstanbul’da Ortaçarşı kurbunda Mercan Ağa mahallesinde sâkine bâ‘isetü’l-kitâb Âişe bt. Osman nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahalle-i mezbûrede sâkine iken bundan akdem vefât eden Fâtıma bt. Mustafa’nın zevci ve terekesinin nısfına vâzı‘ü’l-yed olan Ahmed Çavuş b. Ebûbekir nâm kimesne ile mahmiye-i mezbûrede şıkk-ı evvel defterdârı kāimmakāmı olup müteveffât-ı mezbûrenin zevcinden gayrı vârisi olmamak zu‘mu ile terekesinin nısf-ı âharına vâzı‘ü’l-yed olan Emîrü’l-ümerâ’i’l-kirâm Mehmed Paşa mahzarlarında üzerlerine da‘vâ ve takrîr-i kelâm edip ben müteveffâ-yı mezbûrenin anası olup hattâ müteveffât-ı mezbûre hayâtında huzûr-ı müslimînde ikrâr dahi edip verâseti zevci mezbûr Ahmed Çavuş ile bana münhasıra iken terekesinden nısf hissemi bana teslîmden imtinâ‘ eder suâl olunup müteveffât-ı mezbûrenin terekesinin nısfını bana teslîme mezbûr Ahmed Çavuş ve mûmâ-ileyh Mehmed Paşa’ya tenbîh olunmak matlûbumdur dedikde, gıbbe’s-suâl ve’l-inkâr müdde‘iyye-i mezbûrdan müdde‘âsını mübeyyine beyyine taleb olundukda mahalle-i mezbûre sükkânından Ramazan b. Abdullah ve es-Seyyid Mehmed Efendi b. es-Seyyid Ahmed ve Sadık Efendi b. Hasan ve el-Hâc Mustafa b. el-Hâc Abdülkerim ve mahmiye-i mezbûrede Saray-ı atîk kurbunda vâki‘ mescid-i şerîfde imâm olan Abdullah Efendi b. Hüseyin nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffât-ı mezbûre hayâtında müdde‘iyye-i mezbûre için anamdır deyû kirâren ve mirâren huzûrumuzda ikrâr ve bizi işhâd edip müdde‘iyye-i mezbûre dahi tasdîk etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olup müdde‘iyye-i mezbûre seksen yaşında ve müteveffât-ı mezbûre elli yaşında olmağla müdde‘iyye-i mezbûre müteveffât-ı mersûmeye ana olmağa sâlih olduğu lede’ş-şer‘ sâbit olmağın mûcebince müdde‘iyye-i mezbûrenin vech-i mübeyyen üzre verâsetine ba‘de’l-hükm tereke-i müteveffât-ı mezbûrenin nısfı müdde‘iyye-i mezbûreye teslîme merkūm Ahmed Çavuş ile mûmâ-ileyh Mehmed Paşa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çavuş b. Hasan el-Mübâşir, İdris Çavuş b. Mustafa, Abdüsselâm [b.] Ali, Mustafa b. Piyâle, Mehmed b. Piyâle.