Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 55 Hüküm no: 23 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan oğlu Ali Ağa’nın terekesinden amcasının hissesini aldığı Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçi mahallesinde sâkin iken bundan akdem vefât eden Ali Ağa b. Hasan b. Halil nâm sagīrin verâseti zevce-i metrûkesi Emetullah bt. İbrahim Ağa nâm sagīre ile li-eb kız karındaşı Âişe Hatun ve vilâyet-i Rumeli’nde medîne-i Bosna’da sâkin usûbet-i nesebiyye cihetinden müteveffâ-yı mezbûr Ali Ağa’nın babası mezbûr Hasan Ağa’nın ammisi gāib ani’l-meclis Mehmed Ağa b. Ebubekir Abdullah’a münhasıra ve tashîh-i mes’elesi dört sehimden olup sihâm-ı mezbûreden bir sehmi zevcesi sagīre-i mezbûre Emetullah’a ve iki sehmi kız karındaşı mezbûre Âişe Hatun’a ve bir sehmi gāib-i mezbûr Mehmed Ağa’ya isâbeti tahkīkinden sonra müteveffâ-yı mezbûrun zevcesi sagīre-i mezbûre Emetullah’ın babası ve tesviye-i umûruna kıbel-i şer‘den mansûb vasîsi olan mezbûr İbrahim Ağa b. Mehmed meclis-i şer‘-i şerîf-i enverde müteveffâ-yı mezbûr Ali Ağa’nın terekesine bi’l-verâse vâzı‘atu’l-yed olan kız karındaşı mezbûre Âişe Hatun mahzarında bi’l-velâye ve bi’l-vesâye üzerine da‘vâ ve takrîr-i kelâm edip müteveffâ-yı mezbûr Ali Ağa’nın babası müteveffâ-yı evvel mezbûr Hasan Ağa târîh-i kitâb senesinin Rebî‘ülâhiri’nin yirmi beşinci günü fevtinden iki [ay] mukaddem kızım mezbûre Emetullah’ı oğlu mezbûr Ali Ağa’ya velâyete kırk bin akçe mehr-i müeccel tesmiyesiyle şuhûd mahzarında istinkâh ve tezevvüc ve kabûl ben dahi bi’l-velâye kızım sagīre-i mezbûreyi inkâh ve tezevvüc eylediğimden sonra mezbûr Ali Ağa fevt olmağla kızım sagīre-i mezbûre Emetullah’ın mehr-i müsemmâsı olan meblağ-ı mezbûr kırk bin akçeyi tereke-i müteveffâ-yı mezbûrdan [7b] kızım sagīre-i mezbûre için taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûr İbrahim Ağa’dan müdde‘âsına mutâbık beyyine taleb olundukda udûl-i ahrâr-ı ricâl-i Müslimînden olup medîne-i mezbûrede Câmi‘-i Kebîr mahallesi sükkânından Hüseyin Çelebi b. Hasan ve İsmail Efendi b. el-Hâc Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd ve fi’l-hakīka müteveffâ-yı mezbûr Ali nâm sagīrin babası müteveffâ-yı evvel mezbûr Hasan Ağa b. Halil târîh-i kitâb senesi şehr-i Rebî‘ülâhiri’nin yirmi beşinci günü fevtinden iki ay mukaddem kendi hayâtında oğlu müteveffâ-yı mezbûr Ali Ağa nâm sagīre işbu müdde‘î-i mezbûr İbrahim Ağa’nın kızı sagīre-i mezbûre Emetullah’ı velâyeten kırk bin akçe mehr-i müeccel tesmiyesiyle istinkâh ve tezevvüc ve kabûl eyledikde mezbûr İbrahim dahi bizim huzûrumuzda inkâh ve tezvîc eyledi biz bu husûsa bu vecih üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve el-bette mâ-vaka‘a bi’t-taleb ketbolundu Fi’l-yevmi’s-sâlis ve’l-ışrîn min-Şevvâli’l-mükerrem li-sene tis‘a ve ışrîn ve mi’e ve elf. Şuhûdü’l-hâl: Hasan Ağa b. Mehmed, el-Hâc İbrahim b. Ali, Mustafa Çelebi b. Abdullah, İbrahim Çelebi b. Halil, Süleyman Çelebi b. Mehmed, Mustafa b. Halil, Abdulbâki b. Musa, Veli Efendi b. Ali.