Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 57 Hüküm no: 25 Orijinal metin no: [7M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali oğlu Ömer Beşe’nin çocuklarına nafaka takdiri Havâss-ı Refî‘a kazâsı muzâfâtından Çatalca nâhiyesine tâbi‘ İzdin nâm karyede sâkin iken bundan akdem vefât eden Ömer Beşe b. Ali’nin sulbî sagīr oğlu Feyzullah ve sulbiye sagīre kızı Safiye’nin vâlideleri ve tesviye-i emrlerine kıbel-i şer‘den mansûbe vasiyeleri olan işbu râfi‘atü’l-kitâb Âişe Hatun bt. Mehmed meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasiyeleri olduğum sagīrân-ı mezbûrânın nafaka ve kisve bahâya eşedd-i ihtiyâcları olmağla babaları müteveffâ-yı mezbûrdan müntakil mâllarından her birine kadr-i ma‘rûf nafaka ve kisve bahâ farz ve takdîr olunmak bi’l-vesâye matlûbumdur dedikde vasiyye-i mezbûrenin kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehü ve hüsnü-meâb efendi hazretleri dahi sagīrân-ı mezbûrânın babaları müteveffâ-yı mezbûrdan müntakil mâllarından kadr-i ma‘rûf her birine yevmî üçer akçe nafaka ve kisve bahâ farz ve takdîr buyurup meblağ-ı mefrûz-ı mezbûru sagīrân-ı mezbûrân Feyzullah ve Safiye’nin nafaka ve kisve bahâsına harc ve sarfa ve lede’l-iktizâ ve istidâneye ve inde’z-zafer mâllarına rücû‘a vasiyye-i mezbûre Âişe Hatun’a izin birle mâ-vaka‘a bi’t-taleb ketbolundu Fi’l-yevmi’l-âşir min-Zilka‘deti’ş-şerîfe sene 1129 Şuhûdü’l-hâl: Abdullah Beşe b. İbrahim, İsmail Beşe b. Mehmed, Hüseyin Beşe b. Osman, Mehmed Beşe b. Salih, Ali Çelebi b. Abdulbâki.