Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 397 Hüküm no: 462 Orijinal metin no: [63a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Mansur b. el-Hâc Yunus’un büyük oğlundaki terekesinin diğer vârislere pay edilmesi için vasî tarafından alındığı ve el-Hâc Mansur’a borcu olanların belirlendiği Dârü’l-hilâfeti’l-aliyye Kostantıniyye el-mahmiyye mahallâtından Üskübî mahallesi sâkinlerinden iken bundan akdem vefât eden el-Hâc Mansur b. el-Hâc Yunus’un verâseti zevce-i metrûkesi Selime Hâtun bt. el-Hâc Selame ile sulbî kebîr oğlu el-Hâc Mansur’a ve sulbî sagīr oğlu ( ) ve sulbiye sagīre kızı Fâtıma’ya münhasıra olduğu şer‘an mütehakkik oldukdan sonra sagīrân-ı mezbûrânın li ebeveyn ammileri ve hâlâ kıbel-i şer‘den mansûb vasîleri olan el-Hâc Nasreddin b. el-Hâc Yunus nâm kimesneler meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda sagīrân-ı mezbûrânın karındaşları ve sâbıkan vasîleri olan merkūm el-Hâc Mansur mahzarında ikrâr ve takrîr-i kelâm edip defter-i kassâm nâtık olduğu üzre merkūm el-Hâc Mansur yedinde olan sagīrân-ı mezbûrânın mallarından nakid bir def‘a beş yüz otuz dokuz kıt‘a esedî guruş ve bir def‘a dahi yüz altmış kıt‘a esedî guruş kıymetli evsâfı beynimizde ma‘lûme Rûsiyyü’l-asl Ali nâm gulâmı mezbûr el-Hâc Mansur yedinden vesâyetim hasebiyle alıp kabz eylediğimden sonra mezbûr el-Hâc Mansur sagīrân-ı mezbûrâna on üç bin hurda akçe deyni olan Tophâneli hasırcı el-Hâc Mustafa b. Abdullah’ı ve beş bin hurda akçe deyni olan el-Hâc İbrahim nâm kimesneyi ve iki bin hurda akçe deyni olan İbrahim Çelebi b. el-Hâc Celaleddin’i ve beş bin hurda akçe deyni olan Uceylî el-Hâc Ahmed b. Abdurrahman’ı ihzâr edip mezbûrlar dahi vech-i meşrûh ve mübeyyen üzre sagīrân-ı mezbûrâna deynleri olduğunu muvâcehemde her biri bi’t-tav‘i’s-sâf ikrâr ve i‘tirâf ettiklerinde ben dahi kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü’l-eşbâh el-Hâc Nimetullah, Şeyh Mehmed Settârî, Hacı Mustafa b. Hacı Ali, Mehmed Çelebi b. Hacı Hızır, el-Hâc Sâlim b. Şerefeddin, el-Hâc Kasım b. ( ) Ankaravî.