Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 75 Hüküm no: 41 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil oğlu Şatır el-Hac Hasan Ağa’nın vefatından önce sahip olduğu Yahudihanenin oğluna devri Husûs-ı âti’z-zikrin mahallinde istimâ‘ ve tahrîri iltimâs olunmağın bu fakîr medîne-i hazret-i Ebâ Eyyüb el-Ensârî -radıye anhü Rabbühü’l-Bârî- mahallâtından Kiremitçi Süleyman mahallesinde sâkin iken bundan akdem vefât eden Şatır el-Hâc Hasan Ağa b. Halil’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf olundukda müteveffâ-yı mezbûrun verâseti zevce-i menkûha-i metrûkesi Emine Hatun bt. Abdullah ve Mu‘ammer Hatun bt. Abdullah ile sulbiye kebîre kızı Âişe Hatun’a ve sulbi sagīr oğlu Ali Çelebi’ye münhasıra olduğu şer‘an zâhir ve mütehakkık oldukdan sonra zâtları Ali Halife b. Mehmed ve Hüseyin Çelebi b. Hasan ma‘rifetleriyle mu‘arrefe olan mezbûrât Âişe Hatun ve Emîne Hatun ve Mu‘ammer Hatun meclis-i ma‘kūd-ı mezkûrda sagīr-i mezbûrun tesviye-i umûruna bâ-hüccet-i şer‘iyye vasiyy-i muhtârı olmağla zikr-i âtî Yahûdihâne ta‘bîr olunur menzile bi’l-vesâye vâzı‘u’l-yed olan işbu bâ‘isü’l-kitâb fahrü’l-akrân el-Hâc İbrahim Ağa b. Mehmed mahzarında her biri üzerine da‘vâ ve takrîr-i kelâm edip arsasının mahrûse-i Edirne’de Ali Paşa-yı cedîd vakfına beher mâh yüz elli akçe icâre-i kadîmesi ve binâsı mülk olup mahmiye-i İstanbul’da Balıkpazarı hâricinde vâki‘ bir tarafdan ba‘zan Şemsi Paşa vakfı ve ba‘zan tarîk-ı hâs ve bir tarafdan leb-i deryâ bir tarafdan tarîk-ı âm ile mahdûd Yahûdihâne ta‘bîr olunur menzilin erba‘ı mûrisimiz müteveffâ Hasan Ağa’ya [13a] zevce-i müteveffât Saraylı Şehbaz Hatun’da n isâbet ve intikāl etmekle zikrolunan rub‘ hisse-i şâyi‘i defter-i kassâma idhâl ve beynimizde iktisâm murâd eylediğimizde vasiyy-i mezbûr müstakillen zabt ve deftere idhâlden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında zikrolunan Yahûdihânenin rub‘u müteveffâ-yı mezbûrun irsen mülkü olup lâkin müteveffâ-yı mezbûr Şatır el-Hâc Hasan Ağa b. Halil b. Bekir hâl-i kemâl-i sıhhatinde bin yüz yirmi sekiz senesi Zilhicceti’ş-şerîfesinin üçüncü günü zikrolunan Yahûdihânede olan rub‘ hisse-i şâyi‘asına vasîsi olduğum oğlu sagīr-i mezbûr Ali Çelebi’ye huzûr-ı Müslimînde üç yüz on beş guruşa velâyeten bey‘ ve temlîk edip ve semeninden oğlu sagīr-i mezbûrun zimmetini ibrâ etmekle zikrolunan Yahûdihânenin rub‘u şirâen ve sülüs-i erbâ‘ı irsen mülkü olmuşdur deyu def‘le mukābele edicek gıbbe’l-istintâk ve’l-inkâr vasiyy-i mezbûrdan vak‘a-i meşrûhasına beyyine taleb olundukda udûl-i ahrâr-ı ricâl-i Müslimînden medîne-i mezbûrda Şah Sultân mahallesinde sâkin Mustafa Çelebi b. Abdulbâki ve İsmail Efendi b. Hacı Osman ve Hüseyin Ağa b. Ahmed li-ecli’ş-şehâde meclis-i ma‘kūd-ı mezkûra hâzırûn olup istişhâd olunduklarında fi’l-hakīka müteveffâ-yı mezbûr Şatır el-Hâc Hasan Ağa b. Halil b. Bekir arsasının mahrûse-i Edirne’de Ali Paşa-yı cedîd vakfına beher mâh yüz elli akçe icâre-i kadîmesi ve binâsı mülk olup mahmiye-i mezbûrede Balıkpazarı hâricinde vâki‘ bir tarafdan ba‘zan Şemsi Paşa vakfı ve ba‘zan tarîk-ı hâs ve bir tarafdan leb-i deryâ bir tarafdan tarîk-ı âm ile mahdûd büyût-ı adîdeyi müştemil Yahûdihâne ta‘bîr olunur menzilden rub‘ hisse-i şâyi‘ini bin yüz yirmi sekiz senesi Zilhicceti’ş-şerîfesinin üçüncü günü oğlu sagīr-i mezbûr Ali Çelebi’ye velâyeten üç yüz on beşer guruşa huzûrumuzda bey‘ ve temlîk edip ve semeninden oğlu mezbûr Halil’in zimmetini ibrâ etmekle zikrolunan Yahûdihânenin rub‘u şirâen ve sülüs-i erbâ‘ı irsen sagīr-i mezbûr Ali Çelebi’nin mülkü olmuşdur biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’r-râbi‘ ve’l-ışrîn min-Recebi’l-ferd li-sene tis‘a ve ışrîn ve mi’e ve elf. Şuhûdü’l-hâl: Mustafa Çelebi b. İsmail Efendi, İmâmzâde Molla Mustafa b. Ahmed, Mustafa Beşe b. Ali Beşe, İbrahim b. Halil, Ali Halife b. Mehmed, Berber Hüseyin b. Hasan, Ali Çelebi b. Abdulbâki, es-Seyyid Mustafa b. Sefer, Mahmud b. İsa, Hasan b. Abdullah.