Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 76 Hüküm no: 42 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş oğlu Ahmed Paşa’ya ait yalının vârislerden zevcesi Hadice Hatun’a teslimi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyüb el-Ensârî -aleyhi rahmetü Rabbihi’l-Bârî- mahallâtından Zal Paşa mahallesi ahâlîsinden iken bundan akdem Varadin Muhârebesinde şehîden vefât eden Ahmed Paşa b. Derviş’in hayâtında sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûrun verâseti zevce-i menkûha-i metrûkesi Hadice Hatun bt. İbrahim ve diğer zevcesi Fâtıma bt. Mehmed ile sulbi kebîr oğlu Mustafa Bey ve sulbi sagīr oğulları Yusuf Bey ve İbrahim Bey’e münhasıra ve tashîh-i mes’eleleri kırk sekiz sehimden i‘tibâr olunup sihâm-ı mezbûreden üç sehmi zevcesi mezbûre Hadice Hatun’a ve üç sehmi diğer zevcesi mezbûre Fâtıma Hatun’a on dörder sehmi oğulları mezbûrûn Mustafa Bey ve Yusuf Bey ve İbrahim Bey’den her birine isâbeti tahakkukundan sonra mezbûre Hadice Hatun tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân Süleyman Ağa b. Mustafa Ağa ve İbrahim Ağa b. Mehmed şehâdetleriyle sâbitü’l-vekâle olan İsmail Efendi b. el-Hâc Osman meclis-i ma‘kūd-ı mezkûrda müteveffâ-yı mezbûrun terekesine bi’l-verâse ve bi’l-vesâye vâzı‘u’l-yed olan merkūm Mustafa Bey mahzarında bi’l-vekâle üzerine da‘vâ ve takrîr-i kelâm edip sâlifü’z-zikr mahalle-i mezbûrede vâki‘ bir tarafdan tarîk-ı âm ile mahdûd yalı ta‘bîr olunur arsasının mahmiye-i İstanbul’da Neslişah Sultân vakfına senede bin seksen akçe mukāta‘ası olan mülk menzilin dâhiliyyesinde vâki‘ yalı tarafında iki bâb tahtânî oda ve bir sofa ve kara tarafında iki bâb tahtânî oda ve iki halvetle bir hamâm ve bir câmekân odası ve bir sofa ve bir havuz ve bir kiler ve bir matbah ve kenîf ve zât-ı eşcâr-ı müsmire ve gayr-ı müsmireli bahçeyi muhtevî mülk menzilini bin yüz sekiz senesinde müteveffâ-yı mezbûr Ahmed Paşa b. Derviş b. Abdullah beynlerinde ma‘lûmü’l-kelâm-ı şerîf hediyesine zevcesi müvekkilem mezbûre Hadice Hatun’a bey‘ ve teslîm ve temlîk müvekkilem mezbûre dahi iştirâ ve tesellüm ve kabz ve kabûl edip mezbûr Mustafa Bey menzil-i mahdûd-ı mezkûru teslîmden imtinâ‘ eder suâl olunup teslîmine tenbîh olunmak bi’l-vekâle matlûbumdur dedikde gıbbe’s-suâl ve’l-inkâr vekîl-i mezbûrdan müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden ve mahalle-i mezkûre sükkânından Süleyman Ağa b. Mehmed ve Hüseyin Çelebi b. Abdullah nâm kimesneler li-ecli’ş-şehâde [14a] meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Ahmed Paşa b. Derviş b. Abdullah sâlifü’z-zikr mahalle-i mezbûrede vâki‘ bir tarafdan Rukiye Sultân yalısı ve bir tarafdan Ümmü Sultân kızı yalısı ve bir tarafdan sâhil-i bahr ve bir tarafdan tarîk-ı âm ile mahdûd yalı ta‘bîr olunur arsasının mahmiye-i İstanbul’da Neslişah Sultân vakfına senede bin seksen akçe mukāta‘ası olan mülk menzilin dâhiliyyesinde vâki‘ yalı tarafında iki bâb tahtânî oda ve bir sofa ve kara tarafında iki bâb tahtânî oda ve iki halvetle bir hamâm ve bir câmekân odası ve bir sofa ve bir havuz ve bir kiler ve bir matbah ve kenîf ve zât-ı eşcâr-ı müsmire ve gayr-ı müsmireli bahçeyi muhtevî mülk menzilini zevce-i müvekkile-i mezbûre Hadice Hatun bt. İbrahim’e bin yüz sekiz senesinde beynlerinde ma‘lûm kelâm-ı şerîf hediyesine bey‘ ve teslîm ve temlîk eylediğinde ol dahi ber-vech-i muharrer iştirâ ve tesellüm ve temellük ve kabz ve kabûl eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince menzil-i mahdûd-ı mezkûru müvekkile-i mezbûreye teslîme merkūm Mustafa Bey’e tenbîh eylediğini mevlânâ-yı mezbûr mahallinde ketb ü tahrîr ba‘de ma‘an ba‘s olunan Çukadâr Ali Çelebi b. Abdulbâki ve Muhzır es-Seyyid Mustafa Çelebi b. Sefer ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu Fî-gurreti Şa‘bâni’l-mu‘azzam li-sene tis‘a ve ışrîn ve mi’e ve elf. Şuhûdü’l-hâl: El-Hâc İbrahim Ağa b. Mehmed, Tatar el-Hâc Ahmed Ağa b. Abdünnasır, Hüseyin Çelebi b. Hasan, el-Hâc Yusuf b. Abdullah, Mustafa Çelebi b. İbrahim, es-Seyyid Mehmed b. es-Seyyid Hüseyin, Yalı kethüdâsı Ahmed Ağa, es-Seyyid İsmail b. Mustafa, Vani Ağa b. Mehmed.