Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 397 Hüküm no: 463 Orijinal metin no: [63a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Vartak v. Todor’dan vârislerine intikal eden ev hissesinin Mardiros v. Serhos’a satıldığı Mahmiye-i İstanbul’da Ohri mahallesinde sâkin iken bundan akdem hâlik olan Vartak v. Todor nâm Ermeni’nin verâseti sulbî kebîr oğlu Aleksandra ve sulbî sagīr oğlu Gabril ve sulbiye sagīre kızı Maryem nâm sagīre münhasıra olduğu şer‘an zâhir ve mütehakkik oldukdan sonra sagīrân-ı mezbûrânın tesviye-i umûrlarına kıbel-i şer‘den mansûb vasîleri Hasref v. Kirakor nâm Ermeni meclis-i şer‘de işbu bâ‘isü’l-kitâb Mardiros v. Serhos nâm Ermeni muvâcehesinde ikrâr-ı tâm ve takrîr-i kelâm edip hâlik-i mezbûrdan sagīrân-ı mezbûrâna irsle intikāl eden sagīrân-ı mezbûrânın mülkleri olup mahalle-i mezbûrede vâki‘ bir tarafdan vasiyy-i mezbûr Hasref mülkü ve bir tarafdan kalemkâr Avanos mülkü ve bir tarafdan Solak İbrahim Çelebi mülkü ve bir tarafdan tarîk-i âm ile mahdûd iki bâb fevkānî oda ve bir bâb tahtânî odayı ve bi’r-i mâyı ve kenîf ve hadîkayı müştemil mülk menzilden sagīrân-ı mezbûrânın beş sehimden üç sehmi hisse-i şâyi‘alarını harâba müşrif olmağla ba‘de’l-müzâyede ve inkıtâ‘i’r-rağbe semen-i misli olan dört yüz on iki buçuk esedî guruşa mezbûr Mardiros’a bey‘ ve kabz-ı semen edip ol dahi minvâl-i muharrer üzre [63b] iştirâ ve kabûl ettikden sonra sagīrân-ı mezbûrânın sihâm-ı mezbûreden üç sehim hisse-i şâyi‘aları olan mebî‘-i mezbûr merkūm Mardiros’un mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Manas v. Sahar ve İsrail v. Agop ve Lomez v. Agop, Markos v. Sahar, Kazo v. Todori, Manas v. Markos.