Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 78 Hüküm no: 43 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil oğlu Şatır el-Hâc Hasan’ın terekesinden bazı eşyaları küçük oğluna hibe ettiği Husûs-ı âti’z-zikrin mahallinde istimâ‘ ve tahrîri için bi’l-iltimâs bu fakîr medîne-i hazret-i Ebâ Eyyüb el-Ensârî -radıye anhu Rabbühü’l-Bârî- mahallâtından Kiremitçi Süleyman Çelebi mahallesinde sâkin iken bundan akdem vefât eden Şatır el-Hâc Hasan Ağa b. Halil’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf olundukda müteveffâ-yı mezbûrun verâseti zevce-i menkûha-i metrûkeleri Emine Hatun bt. Abdullah ve Mu‘ammer Hatun bt. Abdullah ile sulbiye kebîre kızı Âişe Hatun’a ve sulbi sagīr oğlu Ali Çelebi’ye münhasıra olduğu şer‘an zâhir ve mütehakkık oldukdan sonra zâtları Ali Halife b. Mehmed ve Hüseyin Çelebi b. Hasan ma‘rifetleriyle mu‘arrefe olan mezbûrât Âişe Hatun ve Emîne Hatun ve Mu‘ammer Hatun meclis-i ma‘kūd-ı mezkûrda sagīr-i mezbûrun tesviye-i umûruna bâ-hüccet-i şer‘iyye vasiyy-i muhtârı olmağla tereke-i müteveffâ-yı mezbûra bi’l-vesâye vâzı‘u’l-yed olan fahrü’l-akrân bâ‘isü’l-kitâb el-Hâc İbrahim Ağa b. Mehmed mahzarında [15a] her biri üzerine da‘vâ ve takrîr-i kelâm edip müteveffâ-yı mezbûr el-Hâc Hasan Ağa’ya zevcesi müteveffât Saraylı Şehbaz Hatun’un terekesinden hissesine isâbet eden işbu bir saçaklı şebgûn ve bir bogasi anteri ve bir beyaz şebgûn ve iki ûdî çekme ve bir siyah hatâyî kaftan ve bir Mâ’î telli hatâyî kaftan ve iki sûret alaca ve bir al hatâyî anterî ve bir beyaz yeşîmî anteri ve bir işleme beyaz kaftan ve bir döşek yüzü ve bir yeşil çuka nâfe nimten kürk ve iki perde ve bir yeşil dîmî dîbâ kaftan ve anteri ve bir beyaz yeşîmî anteri ve iki sandal çintiyan ve bir uzun şâhî kaftan ve bir beyaz işleme sâde ve dört sandal ve bogasi anteri ve bir yeşil bogasi anteri ve bir kadife serpûş ve bir çuka ferâce ve bir peçe ve bir işleme sofra ve bir hamâm rahtı ve üç iskemle sofrası ve iki makrama ve bir don ve gömlek ve üç sandık ve iki yemeni ve iki uçkur ve üç çuka serpûş ve bir siyah çuka seccâde ve bir şal ve bir dîbâ kaftan ve anteri müteveffâ-yı mezbûrun terekesinden olmağla defter-i kassâma idhâl ve beynimizde iktisâm murâd eylediğimizde vasiyy-i merkūm müstakillen zabt ve deftere idhâlinden imtinâ‘ eder suâl olunsun dediklerinde gıbbe’s-suâl vasiyy-i merkūm cevâbında eşyâ-yı muharrere-i mezbûrûn müteveffâ-yı mezbûrun terekesinden olup lâkin müteveffâ-yı mezbûr Şatır el-Hâc Hasan Ağa b. Halil b. Ebubekir hâl-i kemâl-i sıhhatinde bin yüz yirmi sekiz senesi Zilhicceti’ş-şerîfesinin üçüncü günü zikrolunan eşyâyı vasîsi olduğum sagīr-i mezbûr Ali Çelebi’ye huzûr-ı Müslimînde hibe ve temlîk ve velâyeten kabz etmekle eşyâ-yı muharrere-i mezbûre oğlu sagīr Ali Çelebi’nin mülk-i mevhûbu olmuşdur deyu def‘le mukābele edicek gıbbe’l-istintâk ve’l-inkâr vasiyy-i merkūm el-Hâc İbrahim Ağa’dan vak‘a-i meşrûhuna beyyine taleb olundukda udûl-i ahrâr-ı ricâl-i Müslimînden medîne-i mezbûrede Şah Sultân mahallesinde sâkin Mustafa Çelebi b. Abdulbâki ve İsmail Efendi b. Hacı Osman ve Hüseyin Ağa b. Ahmed li-ecli’ş-şehâde meclis-i ma‘kūd-ı mezkûra hâzırûn olup istişhâd olunduklarında fi’l-hakīka müteveffâ-yı mezbûr Şatır el-Hâc Hasan Ağa b. Halil b. Ebubekir hâl-i kemâl-i sıhhatinde bin yüz yirmi sekiz senesi Zilhicceti’ş-şerîfesinin üçüncü günü eşyâ-i memlûkesinden işbu bir saçaklı şebgûn ve bir bogasi anteri ve bir beyaz şebgûn ve iki ûdî çekme ve bir siyah hatâyî kaftan ve bir Mâ’î telli hatâyî kaftan ve iki sûret alaca ve bir al hatâyî anterî ve bir beyaz yeşîmî anteri ve bir beyaz işleme kaftan ve bir döşek yüzü ve bir yeşil çuka nâfe nimten kürk ve iki perde ve bir yeşil dîmî kaftan ve anteri ve bir beyaz yeşîmî anteri [15a] ve iki sandal çintiyan ve bir uzun şâhî kaftan ve bir beyaz işleme şal ve dört sandal ve bogasi anteri ve bir yeşil bogasi anteri ve bir kadife serpûş ve bir çuka ferâce ve bir peçe ve bir işleme sofra ve bir hamâm rahtı ve iki iskemle sofrası ve iki makrama ve bir don ve gömlek ve üç sandık ve iki yemeni ve iki uçkur ve üç serpûş ve bir çuka seccâde ve bir şal ve bir dîbâ kaftan ve anteriyi oğlu sagīr-i merkūm Ali Çelebi’ye huzûrumuzda hibe ve temlîk ve velâyeten kabz etmekle eşyâ-i muharrere-i mezbûre merkūm Ali Çelebi’nin mülk-i mevhûbu olmuşdur biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’r-râbi‘ ve’l-ışrîn min-Recebi’l-ferd sene 1129 Şuhûdü’l-hâl: Mustafa Çelebi b. İsmail Efendi, İmâmzâde Molla Mustafa b. Ahmed Efendi, Mustafa Beşe b. Ali Beşe, İbrahim Çelebi b. Halil, Ali Halife b. Mehmed, Mahmud b. İsa, Berber Hüseyin b. Hasan, Ali Çelebi b. Abdulbâki, İsmail b. Abdullah.