Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 80 Hüküm no: 45 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş kızı Saliha Hatun’un vârislerinin mirastan hisselerini tamamen aldıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Zal Mahmud Paşa mahallesi ahâlîsinden iken Varadin Muhârebesinde şehîden vefât eden Ahmed Paşa b. Derviş’in hayâtında sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde medîne-i mezbûrede Selahi Bey mahallesinde sâkin iken bundan akdem vefât eden Saliha Hatun bt. mezbûr Derviş’in verâseti sadriye kebîre kızı Fâtıma Hatun bt. ( ) ile li-ebeveyn er karındaşı oğulları kebîr Mustafa Bey ve sagīr Yusuf Bey ve İbrahim Bey ebnâ-i mezbûr Ahmed Paşa ve âhar li-ebeveyn er karındaşı oğlu Süleyman Ağa b. Mustafa’ya münhasıra ve tashîh-i mes’elesi sekiz sehimden olup sihâm-ı mezbûrdan dört sehmi kızı mezbûre Fâtıma Hatun ve bir sehmi mezbûrûn Mustafa Bey ve Yusuf ve İbrahim ve Süleyman Ağa’ya isâbeti tahakkukundan sonra sagīrân-ı mezbûrân Yusuf Bey ve İbrahim Bey’in tesviye-i emrlerine kıbel-i şer‘den mansûb vasîleri olan mezbûr Mustafa Bey ve Süleyman Ağa asâleten ve sıyâneten meclis-i ma‘kūd-ı mezkûrda müteveffât-ı mezbûrenin terekesine bi’l-verâse vâzı‘atü’l-yed olan hâfızatü’l-kitâb kızı mezbûre Fâtıma Hatun tarafından husûs-ı âti’l-beyânda vekîl olduğu zât-ı mezbûre bi’l-ma‘rifeti’ş-şer‘iyye ârifân İsmail Efendi b. el-Hâc Osman ve Süleyman Ağa b. Mehmed şehâdetleriyle sâbitü’l-vekâle sadrî kebîre oğlu es-Seyyid Mehmed b. es-Seyyid Hüseyin mahzarında her biri bi’l-asâle ve bi’l-vesâye ikrâr ve takrîr-i kelâm edip mûrisimiz müteveffât-ı mezbûrenin terekesi tahrîr ve ba‘de’l-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere hisselerimize isâbet eden altmışar bin altı yüz yetmiş akçeyi vekîl-i mezbûr es-Seyyid Mehmed Çelebi tamâmen bize def‘ ü teslîm biz dahi bi’l-asâle ve bi’l-vesâye bi-kadri’l-hısas ahz u kabz edip meblağ-ı mezbûrdan müvekkile-i mezbûre Fâtıma Hatun yedinde ve zimmetinde bir akçe ve bir habbe bâkī kalmayıp husûs-ı mîrâsa müte‘allıka âmme-i mîrâs da‘vâsından müvekkile-i mezbûre Fâtıma Hatun’un zimmetini her birimiz bi’l-asâle ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû mütâbe‘at olunan Çukadâr Ali Çelebi b. Abdulbâki ve es-Seyyid Mustafa b. Sefer ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’r-râbi‘ ve’l-ışrîn min-Recebi’l-ferd sene 1129 Şuhûdü’l-hâl: El-Hâc Mustafa Ağa b. Mehmed, Tatar el-Hâc Ahmed Ağa b. Abdurrahman, Yalı kethüdâsı Ahmed Ağa, Dersi? Mehmed Ağa, Berber Hüseyin b. Hasan, Mustafa Efendi b. İsmail, Berber Hasan b. Abdullah.