Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 81 Hüküm no: 46 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil oğlu Şatır el-Hac Hasan Ağa’nın terekesinden iki zevcesinin hisselerini aldıkları Husûs-ı âti’z-zikrin mahallinde ketb ü tahrîri için bi’l-iltimâs bu fakîr medîne-i hazret-i Ebâ Eyyüb el-Ensârî -radıye anhu Rabbühü’l-Bârî- mahallâtından Kiremitçi Süleyman Çelebi mahallesinde sâkin iken bundan akdem vefât eden Şatır el-Hâc Hasan Ağa b. Halil’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf olundukda müteveffâ-yı mezbûrun verâseti zevce-i menkûha-i metrûkeleri Emine Hatun bt. Abdullah ve Mu‘ammer Hatun bt. Abdullah ile sulbiye kebîre kızı Âişe Hatun’a ve sulbi sagīr oğlu Ali Çelebi’ye münhasıra ve tashîh-i mes’elesi kırk sekiz sehimden olmağla sihâm-ı mezbûrenin üçer sehmi zevceleri mezbûretândan her birine ve on dört sehmi kızı mezbûre Âişe Hatun’a ve yirmi sekiz sehmi oğlu sagīr-i mezbûr Ali Çelebi’ye isâbeti tahkīkinden sonra zâtları İsmail Efendi b. el-Hâc Osman ve Hüseyin Ağa b. Ahmed ta‘rîfleriyle mu‘arrefe olan mezbûretân Emine Hatun ve Mu‘ammer Hatun meclis-i ma‘kūd-ı mezkûrda sagīr-i mezbûrun tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘u’l-yed olan işbu bâ‘isü’l-kitâb fahrü’l-akrân el-Hâc İbrahim Ağa b. Mehmed ile mezbûre Âişe Hatun mahzarlarında her biri ikrâr ve takrîr-i kelâm edip mûrisimiz müteveffâ-yı mezbûrun terekesi tahrîr ve ba‘de ihrâci’l-masraf ber-mûceb-i defter-i kassâm-ı askerî tashîh-i mezbûr üzere hissemize isâbet eden yirmi sekiz bin altışar yüz kırkar akçe ile bin ikişer yüz akçe mehr-i müeccelimiz ki cem‘an yirmi dokuz bin kırkar akçeyi tereke-i müteveffâ-yı mezbûrdan olmak üzere merkūm el-Hâc İbrahim Ağa bize def‘ ü teslîm biz dahi tamâmen yedinden alıp kabz eyledik meblağ-ı mezbûr yirmi dokuz bin sekiz yüz kırkar akçeden vasiyy-i merkūm el-Hâc İbrahim Ağa yedinde bir akçe ve bir habbe hakkımız bâkī kalmayıp müteveffâ-yı mezbûrun dâhil-i defter ve hâric-i defter terekesine ve mahalle-i mezbûrda lede’l-ahâlî ve’l-cîrân vâki‘ ma‘lûmü’l-hudûd ve’l-müştemilât binâsı mülk Yahudihâne ta‘bîr olunur menzile müte‘allıka âmme-i mîrâs da‘vâsından sagīr-i mezbûr Ali Çelebi’nin ve mezbûre Âişe Hatun’un zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledik ba‘de’l-yevm mûrisimiz müteveffâ-yı mezbûr el-Hâc <>Hasan Ağa’nın terekesine müte‘allıka sagīr-i mezbûr Ali Çelebi ve mezbûre Âişe Hatun ve vasiyy-i mezbûr el-Hâc İbrahim Ağa ile vechen mine’l-vücûh ve sebeben mine’l-esbâb da‘vâ ve nizâ‘ımız kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’r-râbi‘ ve’l-ışrîn min-Recebi’l-ferd li-sene tis‘a ve ışrîn ve mi’e ve elf. Şuhûdü’l-hâl: İsmail Efendi b. el-Hâc Osman, Hüseyin Ağa b. Ahmed, Mustafa Çelebi b. İsmail, İmâmzâde Mustafa b. Ahmed, İbrahim Çelebi b. Halil, Mustafa Beşe b. Ali, Ali Halîfe b. Mehmed, Berber Hüseyin b. Hasan, Ali Çelebi b. Abdulbâki.