Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 82 Hüküm no: 47 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil oğlu Şatır el-Hac Hasan Ağa’nın kızı Ayşe Hatun’un babasının terekesinden alacağını talebi Husûs-ı âti’z-zikrin mahallinde istimâ‘ ve tahrîri için bi’l-iltimâs savb-ı şer‘-i enverden me’zûnen irsâl olunan Mevlânâ Abdülkadir Efendi b. el-merhûm Abdullah Efendi medîne-i hazret-i Ebâ Eyyüb el-Ensârî -radıye anhu Rabbühü’l-Bârî- mahallâtından Kiremitçi Süleyman Çelebi mahallesinde sâkin iken bundan akdem vefât eden Şatır el-Hâc Hasan Ağa b. Halil’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun sulbiye kebîre kızı olup zâtı İsmail Efendi b. el-Hâc Osman ve Hüseyin Ağa b. Ahmed ta‘rîfleriyle mu‘arrefe olan işbu bâ‘isetü’l-kitâb Âişe Hatun meclis-i ma‘kūd-ı mezbûrda müteveffâ-yı mezbûrun sulbî sagīr oğlu Ali Çelebi’nin tesviye-i umûruna bâ-hüccet-i şer‘iyye vasiyy-i muhtârı olmağla tereke-i müteveffâ-yı mezbûr[a] bi’l-vesâye vaz‘-ı yed eden fahrü’l-akrân İbrahim Ağa b. Mehmed mahzarında üzerine da‘vâ ve takrîr-i kelâm edip babam müteveffâ-yı mezbûra fevtinden bir buçuk sene mukaddem eşyâ-i memlûkemden üç ayaklı bir inci askılı bir çift la‘l küpe ve üç yâfteli dokuz elmaslı bir ön kuşağımı âhara bey‘ için teslîm ol dahi ba‘de’l-kabz zikrolunan la‘l küpeyi dört yüz elli guruşa ve kuşağı sekiz yüz guruşa cem‘an bin iki yüz elli guruşa âhara bey‘ ve semenini ahz u kabz ve masârıfına sarf [ü] istihlâk edip hattâ babam müteveffâ-yı mezbûr Şatır Hasan Ağa b. Halil b. Ebubekir meblağ-ı mezbûr bin iki yüz elli guruş cihet-i mezbûrdan [16b] zimmetinde bana vâcibü’l-edâ deyni olduğunu fevtinden on ay mukaddem huzûr-ı Müslimînde ikrâr ve işhâd dahi edip meblağ-ı mezbûru bana kable’l-edâ <>fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahalle-i mezbûre ahâlîsinden İsmail Çelebi b. Abdullah ve Hasan b. Abdullah ve Molla Mustafa b. Abdulbâki ve Ali Çelebi b. Mehmed li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr Şatır Hasan Ağa b. Halil b. Ebubekir hâl-i kemâl-i sıhhatinde fevtinden on ay mukaddem kızı işbu müdde‘iye-i mezbûre Âişe Hatun’un eşyâ-i memlûkesinden inci askılı üçer ayaklı bir çift la‘l küpesini dört yüz guruşa ve üç yâfteli dokuz elmaslı bir ön kuşağını sekiz yüz guruş ki cem‘an bin iki yüz elli guruşa âhara bey‘ ve semenini ahz u kabz etmekle meblağ-ı mezbûr bin iki yüz elli guruş cihet-i mezbûrdan kızım mezbûre Âişe Hatun’a zimmetimde deynim var deyu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘de ma‘an irsâl olunan Ali Çelebi b. Abdulbâki ve es-Seyyid Mustafa Çelebi b. Sefer ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sâlis ve’l-ışrîn min-Recebi’l-ferd li-sene tis‘a ve ışrîn ve mi’e ve elf. Şuhûdü’l-hâl: İsmail Efendi b. el-Hâc Osman, Hüseyin Ağa b. Ahmed, İbrahim Bey b. Halil, İmâmzâde Mustafa Çelebi b. Ahmed Efendi, Mahmud b. İsa ve gayruhüm mine’l-hâ[zırîn]