Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 83 Hüküm no: 48 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil oğlu Şatır el-Hac Hasan Ağa’nın terekesinden oğlunun hissesini aldığı Husûs-ı âti’z-zikrin mahallinde ketb ü tahrîri için bi’l-iltimâs bu fakîr medîne-i hazret-i Ebâ Eyyüb el-Ensârî -radıye anhu Rabbühü’l-Bârî- mahallâtından Kiremitçi Süleyman Çelebi mahallesinde sâkin iken bundan akdem vefât eden Şatır el-Hâc Hasan Ağa b. Halil’in [ile]’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf olundukda müteveffâ-yı mezbûrun verâseti zevce-i menkûha-i metrûkeleri Emine Hatun bt. Abdullah ve Mu‘ammer Hatun bt. Abdullah ile kebîre kızı Âişe Hatun ve sulbi sagīr oğlu Ali Çelebi’ye münhasıra ve tashîh-i mes’elesi kırk sekiz sehimden olmağla sihâm-ı mezbûrenin üçer sehmi zevceleri mezbûretândan her birine ve on dört sehmi kızı Âişe Hatun’a ve yirmi sekiz sehmi oğlu mezbûr Ali’ye isâbeti tahkīkinden sonra zâtı İsmail Efendi b. el-Hâc Osman ve Hüseyin Ağa b. Ahmed ta‘rîfleriyle mu‘arrefe olan mezbûre Âişe Hatun meclis-i ma‘kūd-ı mezkûrede sagīr-i mezbûr Ali Çelebi’nin tesviye-i umûruna bâ-hüccet-i şer‘iyye vasiyy-i muhtârı olmağla tereke-i müteveffâ-yı mezbûra bi’l-vesâye vâzı‘u’l-yed olan işbu bâ‘isü’l-kitâb fahrü’l-akrân el-Hâc İbrahim Ağa b. Mehmed mahzarında ikrâr ve takrîr-i kelâm edip babam müteveffâ-yı mezbûrun terekesi tahrîr ve ba‘de ihrâci’l-masârıf ber-mûceb-i defter-i kassâm-ı askerî tashîh-i mezbûr üzere hissemize isâbet eden yüz otuz üç bin altı yüz elli yedi akçeyi tereke-i müteveffâ-yı mezbûrdan olmak üzere vasiyy-i mezbûr el-Hâc İbrahim Ağa bana def‘ ü teslîm ben dahi yedinden tamâmen alıp kabz eyledim meblağ-ı mezbûr yüz otuz üç bin altı yüz elli yedi akçeden vasiyy-i mezbûr el-Hâc İbrahim Ağa yedinde bir akçe ve bir habbe hakkım bâkī kalmayıp babam müteveffâ-yı mezbûrun dâhil-i defter ve hâric-i defter cemî‘-i terekesine ve medîne-i mezbûrda zikrolunan Kiremitçi Süleyman Çelebi mahallesinde vâki‘ ma‘lûmü’l-hudûd ve’l-müştemilât mülk menzile ve mahmiye-i İstanbul’da Balıkpazarı hâricinde vâki‘ ma‘lûmü’l-hudûd ve’l-müştemilât binâsı mülk-i Yahûdihâneye müte‘allıka âmme-i mîrâs da‘vâsından karındaşım sagīr-i mezbûr Ali Çelebi’nin zimmetini ibrâ-i âm ile kātı‘u’n-nizâ‘la ibrâ ve ıskāt eyledim ba‘de’l-yevm babam müteveffâ-yı mezbûrun terekesine müte‘allıka karındaşım sagīr-i mezbûr Ali Çelebi ile ve vasiyy-i mezbûr el-Hâc İbrahim Ağa ile vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketbolundu. Fi’l-yevmi’r-râbi‘ ve’l-ışrîn min-Recebi’l-ferd li-sene tis‘a ve ışrîn ve mi’e ve elf. Şuhûdü’l-hâl: İsmail Efendi b. el-Hâc Osman, Mustafa Çelebi b. İsmail Efendi, Mustafa Çelebi b. Abdullah Ağa, Mustafa Çelebi b. Ahmed İmâmzâde, İbrahim Çelebi b. Halil, Mustafa Beşe b. Ali Beşe, Ali Halîfe b. Mehmed, Berber Hüseyin Çelebi b. Hasan, Ali Çelebi b. Abdulbâki, es-Seyyid Mustafa b. Sefer, Mahmud b. İsa.