Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 398 Hüküm no: 464 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın, evini İbrahim Efendi b. Mehmed’e sattığı Husûs-ı âti’l-beyânın tahrîri iltimâs olunmağın savb-ı şer‘-i şerîfden irsâl olan mevlânâ Mustafa Efendi b. Muharrem mahmiye-i İstanbul’da merkūm Kapıağası Mahmud Ağa mahallesinde mefharü’l-erbâbi’t-tahrîr ve’l-kalem zübdetü ashâbi’t-takrîr ve’r-rakam İbrahim Efendi b. Mehmed’in sâkin olduğu menzil-i âlîlerine varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i mübîn ettikde mahalle-i mezbûre sâkinelerinden Âişe bt. Abdullah nâm hâtun zâtı mahalle-i mezbûre sükkânından Mehmed Efendi b. Mustafa ve Hasan Efendi b. Mustafa ta‘rîfleriyle mu‘arrefe oldukdan sonra meclis-i ma‘kūd-ı mezbûrda müşârün-ileyh İbrahim Efendi b. Mehmed mahzarında ikrâr ve takrîr-i kelâm edip akd-i âtînin sudûruna değin yedimde mülküm ve hakkım olup mahalle-i mezbûrda vâki‘ bir tarafdan ulemâya meşrûta vakıf menzil ve bir tarafdan benim âhar mülküm ve bir tarafdan Abdülkerim nâm kimesnenin mülkü ve bir tarafdan ba‘zen Musli Paşa mülkü ve ba‘zen Dilâver Çavuş mülkü ve bir tarafdan müşârün-ileyh İbrahim Efendi mülkü ile mahdûd iki bâb tahtânî oda ve bir sofa ve bir su kuyusu ve bahçeyi müştemil mülk menzil bi cümleti’t-tevâbi‘ ve’l-levâhık ve kâffeti’l-hukūk ve’l-merâfık müşârün-ileyh İbrahim Efendi’ye bin iki yüz esedî guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semeni olan meblağ-ı mezbûr bin iki yüz kıt‘a esedî guruşu müşârün-ileyh İbrahim Efendi yedinden tamâmen ahz u kabz eyledim ba‘de’l-yevm menzil-i mahdûd-ı mezbûr müşârün-ileyh İbrahim Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan Mustafa Çelebi b. İbrahim ve Veli Beşe b. Mahmud ile meclis-i şer‘a gelip alâ vukū‘ihî inhâ ve ihbâr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Efendi b. Mustafa el-İmâm-ı mahalle-i mezbûre, Şaban Efendi el-Müderris, Hasan Efendi b. Mustafa, İbrahim Çelebi b. ( ) Çukadâr, Ali Ağa b. Mustafa, İbrahim Bey b. Ömer, es-Seyyid Mehmed b. es-Seyyid Mustafa.