Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 96 Hüküm no: 55 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Abdullah oğlu el-Hac Mustafa’nın çocuklarına nafaka tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Düğmecibaşı mahallesinde sâkin iken bundan akdem vefât eden el-Hâc Mustafa b. el-Hâc Abdullah’ın sulbî sagīr oğulları Ali ve Mehmed Emin ve Mes‘ud’un tesviye-i emrlerine kıbel-i [şer‘den] mansûb vasîleri olan işbu râfi‘u’l-kitâb Veli Çelebi b. Ali meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasîleri olduğum sagīrûn-ı mezbûrûnun nafaka ve kisve bahâya eşedd-i ihtiyâcları olmağla babaları müteveffâ-yı mezbûrdan müntakil mâlından kadr-i ma‘rûf nafaka ve kisve bahâ farz ve takdîr olunmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrûn-ı mezbûrûnun her birine yevmî yedişer akçe nafaka ve kisve bahâ farz ve takdîr buyurup meblağ-ı mefrûz-ı mezbûru sagīrûn-ı mezbûrûn Ali ve Mehmed Emin ve Mes‘ud’un nafaka ve kisve bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasiyy-i mezbûr Veli Çelebi’ye izin birle mâ-vaka‘a bi’t-taleb ketbolundu. Fi’l-yevmi’s-sâdis min-Ramazâni’l-mübârek sene 1129 Şuhûdü’l-hâl: Mehmed Efendi b. Mustafa, Seyyid Mustafa b. Sefer, Ali Çelebi b. Veli, es-Seyyid Necmi Veli, Hüseyin Çelebi b. Mustafa, es-Seyyid eş-Şeyh Hüseyin Efendi b. Şükrullah Efendi, es-Seyyid Süleyman b. es-Seyyid Mehmed.