Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 399 Hüküm no: 465 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Hasan’ın kardeşini bıçaklayıp ölümüne sebep olduğu Muharrem Beşe ile olan davasında sulh olduğu Fi’l-asl vilâyet-i Anadolu’da medîne-i Erzurum’da Dere mahallesi sükkânından olup bi tarîki’l-müsâfir medîne-i Üsküdar’da Vâlide hanı’nda sâkin Ramazan b. Hasan nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb Muharrem Beşe b. Ahmed nâm kimesne mahzarında ikrâr-ı tâm ve takrîr-i kelâm edip târih-i kitâbdan iki ay mukaddem mezbûr Muharrem Beşe Karadeniz Boğazı’nda vâki‘ Tarabya iskelesinde li ebeveyn karındaşı Mehmed nâm kimesneyi bir kara saplı bıçak ile amden sol böğrüne urup mecrûh edip ol cerhden karındaşım merkūm Mehmed fevt olmuşidi deyû bundan akdem merkūm Mehmed Beşe’den mûceb-i şer‘îsini da‘vâ eylediğimde ol dahi inkâr etmeğin beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip da‘vâ-yı mezbûremden merkūm Muharrem Beşe ile beynimizde bin fıddî râyic fi’l-vakt akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezkûr bin akçeyi merkūm Muharrem Beşe yedinden tamâmen alıp kabz edip husûs-ı merkūma mü[te]‘allika da‘vâdan merkūm Mehmed Beşe’yi ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Beşe b. Ali, Ahmed Beşe b. Mustafa, Mustafa Beşe b. Yusuf, Ahmed Beşe b. Murad, Hasan Beşe el-Mübâşir.