Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 109 Hüküm no: 67 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Saliha’nın oğluna vasi tayini Havâss-ı Refî‘a kazâsı muzâfâtından Silivri kasabasında vâki‘ Pîrî Paşa mahallesinde sâkine iken bundan akdem vefât eden Saliha bt. Abdullah nâm hâtunun sadrî sagīr oğlu Mehmed’in tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf her vechle vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘ zâhir ve mukarrer olan sagīr-i mezbûrun babası işbu sâhibü’l-kitâb Mehmed Ağa b. İbrahim nâm kimesneyi hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vakt-i rüşd-i sedâdına değin tesviye-i umûruna vasî nasb ve ta‘yîn buyurduklarında ol dahi vesâyet-i mezbûru kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’t-tâsi‘ aşer min-Zilka‘deti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Mustafa Efendi b. Ali, Hasan Ağa b. Ömer, Odabaşı Mehmed Ağa b. Mustafa, Ahmed Çelebi b. Kenan, Hasan Beşe b. Mehmed, Ali Çelebi b. Abdulbâki ve gayruhüm.