Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 110 Hüküm no: 68 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Saliha’nın oğluna nafaka tayini Havâss-ı Refî‘a kazâsı muzâfâtından Silivri kasabasında vâki‘ Pîrî Paşa mahallesinde sâkine iken bundan akdem vefât eden Saliha bt. Abdullah nâm hâtunun sadrî sagīr oğlu Mehmed’in babası ve tesviye-i umûruna kıbel-i şer‘den vasî olan işbu sâhibü’l-kitâb Mehmed Ağa b. İbrahim nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip vasîsi olduğum sagīr-i mezbûrun nafaka ve kisve bahâya eşedd-i ihtiyâcı olmağla vâlidesi müteveffât-ı mezbûreden müntakil mâlından kadr-i ma‘rûf meblağ nafaka ve kisve bahâ farz [ve] takdîr olunmak matlûbumdur dedikde vasiyy-i mezbûrun kelimât-ı meşrûha[sı] vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vâlidesi müteveffât-ı mezbûrdan müntakil mâlından kadr-i ma‘rûf beher yevm dörder akçe nafaka ve kisve bahâsına harc ve sarfa ve lede’l-iktizâ istidâne ve inde’z-zafer mâlına rücû‘a vasiyy-i mezbûr Mehmed Ağa’ya izin birle mâ-vaka‘a bi’t-taleb ketbolundu. Fi’l-yevmi’t-tâsi‘ aşer min Zilka‘deti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Mustafa Efendi b. Ali, Hüseyin Ağa b. Ömer, Mehmed Ağa b. Mustafa, Ahmed Çelebi b. el-Hâc Kenan, Hasan Beşe b. Mehmed, Ali Çelebi b. Abdulbâki, Mustafa Çelebi b. Osman, Ahmed b. Mehmed ve gayrühüm