Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 110 Hüküm no: 69 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zülfikar oğlu Ali Ağa’nın oğluna vasi tayini Medîne-i hazret-i Ebâ Eyyüb Ensârî -aleyhi rahmetü Rabbihi’l-Bârî- mahallâtından Cezerî Kasımpaşa mahallesinde sâkin iken bundan akdem vefât eden Ali Ağa b. Zülfikar’ın sulbî sagīr oğlu Mustafa’nın tesviye-i umûruna kıbel-i şer‘den bir vasî nasbı lâzım ve mühim olmağın emânet ile mu‘arrefe ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan işbu râfi‘u’l-kitâb Hamâmî Mustafa Ağa b. Hüseyin’i hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun tesviye-i umûruna vasî nasb ve ta‘yîn eyledikde ol dahi vesâyet-i merkūmeyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: El-Hâc Ömer Ağa b. el-Hâc Zülfikar, el-Hâc İbrahim b. Mehmed Efendi, Veli Efendi b. Ali, Mehmed b. Yusuf, Mehmed Çelebi b. Ali, es-Seyyid Mustafa Efendi, es-Seyyid Süleyman Çelebi b. es-Seyyid Mehmed, es-Seyyid Yahya b. İbrahim Efendi, Süleyman Efendi b. Mehmed.