Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 111 Hüküm no: 70 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah kızı Hadice’nin Hasan oğlu Mehmed Çelebi’nin terekesinden alacağının tahsili Husûs-ı âti’l-beyânın mahallinde ketb ve istimâ‘ ve iltimâs olunmağın bu fakîr medîne-i hazret-i Ebâ Eyyüb Ensârî -radıye anhu Rabbühü’l-Bârî-’de Cezerî Kasımpaşa mahallesinde sâkin iken bundan akdem vefât eden Mehmed Çelebi b. Hasan b. Hüseyin nâm kimesnenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mahalle-i mezbûre sâkinelerinden olup zâtı İmâm İbrahim Efendi b. Mehmed Efendi ve Hasan Çelebi b. İsmail nâm kimesneler ta‘rîfleriyle mu‘arrefe olan işbu bâ‘isü’l-kitâb Hadice bt. Abdullah nâm hatun meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘u’l-yed olan Mehmed Ağa b. Mehmed nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çelebi b. Hasan b. Hüseyin zimmetinde cihet-i karz-ı şer‘den olmak üzere yüz otuz guruş hakkım olup hattâ müteveffâ-yı mezbûr fevtinden iki gün mukaddem bana ol kadar deyni olduğunu huzûr-ı Müslimînde ikrâr ve işhâd dahi edip meblağ-ı mezbûr yüz otuz guruşu kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl vasiyy-i mezbûr Mehmed Ağa cevâbında fi’l-hakīka müteveffâ-yı mezbûrun terekesine vaz‘-ı yedini ikrâr lâkin deyn-i mezkûru inkâr edicek işbu müdde‘iye-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup sâlifü’z-zikr mahalle-i mezbûre sâkinlerinden mu‘arrefân-ı mezbûrân İmâm el-Hâc İbrahim Efendi b. Mehmed ve Hüseyin Çelebi b. İsmail nâm kimesneler li-ecli’ş-şehâde meclis-i mezkûra hâzırân olup isre’l-istişhâd fi’l-hakīka müteveffâ-yı mezbûr Mehmed Çelebi b. Hasan b. Hüseyin zimmetinde cihet-i karz-ı şer‘den olmak üzere işbu müdde‘iye-i mezbûra yüz otuz guruş deyni olduğunu fevtinden iki gün mukaddem bizim huzûrumuzda ikrâr ve bizi işhâd dahi eyledi biz bu husûsa bu vech üzere şâhidleriz ve şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm vasiyy-i mezbûr Mehmed Ağa’ya meblağ-ı mezbûru edâya tenbîh birle mâ-vaka‘a bi’t-taleb ketbolundu. Fi’l-yevmi’l-hâmis min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Mustafa Çelebi b. Mehmed, Süleyman Çelebi b. Mehmed, el-Hâc Mustafa b. Sefer, Mehmed Efendi b. el-Hâc Abdullah ve gayrühüm.