Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 134 Hüküm no: 87 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah oğlu Mehmed Beşe’nin vefat eden Abdurrahman oğlu Abdullah Efendi terekesinden alacağını talebi Mahmiye-i İstanbul’da İlyaszâde mahallesinde sâkin işbu râfi‘u’l-kitâb Mehmed Beşe b. Abdullah meclis-i şer‘-i şerîf-i enverde Havâss-ı Refî‘a kazâsı muzâfâtından Terkos nâhiyesine tâbi‘ Sert nâm karyede çiftliği olup mahmiye-i mezbûrede Mehmed Ağa câmi‘-i şerîfi kurbünde sâkin iken düyûn terekesinden ezyed olduğu hâlde bundan akdem vefât eden Abdullah Efendi b. Abdurrahman b. Mehmed’in düyûn-ı müsbetesini edâya kıbel-i şer‘den vasî ve kayyım nasb olunup Mustafa Çelebi b. Şa‘ban mahzarında üzerine da‘vâ ve takrîr-i kelâm edip müteveffâ-yı mezbûr Abdullah Efendi b. Abdurrahman b. Mehmed zimmetinde ba‘de’l-hesâb beynimizde ma‘lûm hınta semeninden altı bin beş yüz akçe hakkım olup hattâ müteveffâ-yı mezbûr fevtinden iki ay mukaddem ol kadar deyni olduğu[nu] huzûr-ı Müslimînde ikrâr ve işhâd dahi edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbık beyyine taleb olundukda udû[l]-i ahrâr-ı ricâl-i Müslimînden olup mahmiye-i mezbûrede Mehmed Ağa mahallesinde sâkin Mehmed b. Mustafa ve sâlifü’z-zikr İlyaszâde mahallesinde sâkin Mahmud b. Hüseyin nâm kimesneler li-ecli’ş-şehâde meclis-i şer‘a hâzırân olup isra istişhâd fi’l-hakīka müteveffâ-yı mezbûr Abdullah Efendi b. Abdurrahman b. Mehmed fevtinden iki ay mukaddem işbu müdde‘î-i mezbûr zimmetinde ba‘de’l-hesâb beynlerinde ma‘lûm hınta semeninden altı bin beş yüz akçe deyni olduğu[nu] ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince bade’l-hükm mâ-vaka‘a bi’t-taleb ketbolundu. Fi’l-yevmi’s-sâdis min-Muharremi’l-harâm li-sene selâsîn ve mi’e ve elf. Şuhûdü’l-hâl: Es-Seyyid Mustafa b. Sefer, Mehmed Efendi b. İbrahim, Ömer Efendi b. Mehmed, Mustafa Efendi b. Hüseyin.