Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 139 Hüküm no: 93 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersâne-i âmire kâtibi Osman oğlu Ali Efendi’nin terekesinden zevcesinin alacağını talebi Husûs-ı âti’l-beyânın mahallinde istimâ‘ ve tahrîri için bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Takyecibaşı mahallesinde sâkin iken bundan akdem vefât eden Tersâne-i âmire kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı Mehmed Efendi b. Yusuf ve Süleyman Efendi b. Mehmed ta‘rîfleriyle mu‘arrefe olan işbu râfi‘atü’l-kitâb Havva Hatun bt. el-Hâc Osman meclis-i şer‘-i ma‘kûd-ı mezkûrda müteveffâ-yı mezbûr Ali Efendi’nin li-ebeveyn karındaşı olmağla tereke-i müteveffâ-yı mezbûra bi’l-verâse vâzı‘atü’l-yed olup zâtı kezâlik mu‘arrefân-ı mezbûrân ta‘rîfleriyle mu‘arrefe olan Hadice Hatun bt. mezbûr Osman mahzarında üzerine da‘vâ ve takrîr-i kelâm edip yedine mülk ve hakkım olup Kasaba-i Hasköy’de vâki‘ ma‘lûmü’l-hudûd ve’l-müştemilât mülk bağ hânesi ba‘de’l-müzâyede bey‘ ve semenini bana teslîm eyleye deyu zevcim müteveffâ-yı mezbûr Ali Efendi b. Osman b. Abdullah’ı tarafımdan vekîl edip ol dahi vekâlete zikrolunan bağ hâneyi yedi yüz guruşa âhara bey‘ ve semeni olan meblağ-ı mezbûru ahz u kabz ve kendi masârıfına sarfla istihlâk edip zevcim müteveffâ-yı [mezbûr] hâl-i hayâtında ve kemâl-i akl-ı sıhhatinde fevtinden bir sene mukaddem meblağ-ı mezbûr yedi yüz guruşu cihet-i mezkûreden zimmetinde bana vâcibü’l-edâ deyni olduğu huzûr-ı müslimînde ikrâr ve işhâd edip kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsına mutâbık beyyine taleb olundukda udûl-i ahrâr-ı ricâl-i Müslimînden medîne-i mezbûre[de] Fethiçelebi mahallesi sâkinlerinden Mustafa Çelebi b. Ali ve Ahmed Efendi [Çelebi] b. Hüseyin ve mahmiye-i İstanbul’da Sancakdar Hayreddin [34a] mahallesi sâkinlerinden Mahmud Çelebi b. Ali ve Ahmed Efendi b. Mehmed nâm kimesneler li-ecli’ş-şehâde meclis-i ma‘kūd-ı mezkûra hâzırûn olup istişhâd olunduklarında fi’l-hakīka işbu müdde‘iye-i mezbûre yedinde mülk ve hakkı olup Kasaba-i Hasköy’de vâki‘ ma‘lûmü’l-hudûd ve’l-müştemilât mülk bağ hânesine zevci müteveffâ-yı mezbûr mahzen kâtibi Ali Efendi b. Osman b. Abdullah zevcesi müdde‘iye-i mezbûre tarafından vekâlete yedi yüz guruşa âhara bey‘ ve semeni olan meblağ-ı mezbûru ahz u kabz ve kendi masârıfıma sarfla istihlâk eyledim deyu hâl-i hayâtında ve kemâl-i akl-ı sıhhatinde fevtinden bir sene mukaddem zevcesi müdde‘iye-i mezbûreye meblağ-ı mezbûr yedi yüz guruş zimmetimde cihet-i mezkûreden vâcibü’l-edâ deynim vardır deyu huzûrumuzda ikrâr ve işhâd eyledi biz bu husûsa bu vech üzere şâhideleriz şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’l-hâmis aşer min-Saferi’l-hayr li-sene selâsîn ve mi’e ve elf. Şuhûdü’l-hâl: Mehmed Efendi İmâm, Süleyman Efendi el-müezzin, el-Hâc Mehmed b. Mustafa, el-Hâc Mustafa b. Abdullah, Ali b. Mehmed, İbrahim b. Mehmed.