Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 140 Hüküm no: 94 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman kızı Hadice Hatun’un Tersâne-i âmire kâtibi Osman oğlu Ali Efendi’nin terekesindeki hissesini aldığı Husûs-ı âti’l-beyânın mahallinde ketb ve tahrîri için bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Takyecibaşı mahallesinde sâkin iken bundan akdem vefât eden Tersâne-i âmire kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî olundukda müteveffâ-yı mezbûr Ali Efendi’nin li-ebeveyn kız karındaşı olup zâtı Mehmed Efendi b. Yusuf ve Süleyman Efendi b. Mehmed ta‘rîfleriyle mu‘arrefe olan Hadice Hatun bt. Osman meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olan işbu râfi‘atü’l-kitâb Havva Hatun bt. Osman mahzarında ikrâr ve takrîr-i kelâm edip karındaşım müteveffâ-yı mezbûr Ali Efendi’nin terekesinden olmak üzere yüz yirmi guruş bana def‘ ü teslîm ben dahi mezbûre Havva Hatun yedinden bi’t-tamâm ahz u kabz edip karındaşım müteveffâ-yı mezbûrun terekesinden akār ve menkūl ve nükūd ve bi’l-cümle ism-i mâl ıtlâk olunur âmme-i mîrâs da‘vâsından ben mezbûre Havva Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde mezbûre Havva Hatun dahi meblağ-ı mezbûr yüz yirmi guruş mutâlebesinden merkūme Hadice Hatun’un zimmetini ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketbolundu. Fi’l-yevmi’l-hâmis aşer min-Saferi’l-hayr li-sene selâsîn ve mi’e ve elf. Şuhûdü’l-hâl: Mehmed Efendi b. Yusuf İmâm, Süleyman Efendi b. Mehmed el-müezzin, el-Hâc Mustafa b. Abdullah, Ahmed Efendi b. İbrahim, es-Seyyid Mustafa b. Sefer, Ahmed Çelebi b. Hüseyin.