Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 141 Hüküm no: 95 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giro oğlu Melgo’nun Abdurrahman oğlu Abdullah Efendi terekesinden alacağının tahsili Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refî‘a kazâsı muzâfâtından Terkos nâhiyesine tâbi‘Sırtgökçeli nâm karyede sâkin iken bundan akdem vefât eden Abdullah Efendi b. Abdurrahman b. Mehmed’in ile’l vefât sâkin olduğu çiftliğe varıp zeyl-i sükkânından işbu râfi‘u’s-sifr Melko v. Giro nâm zimmî meclis-i ma‘kūd-ı mezkûrda müteveffâ-yı mezbûrun düyûn-ı müsbetesini edâya kıbel-i şer‘den vasî ve kayyım nasb olunan Mustafa Çelebi b. Şa‘ban mahzarında üzerine da‘vâ ve takrîr-i kelâm edip müteveffâ-yı mezbûr Abdullah Efendi b. Abdurrahman b. Mehmed zimmetinde cihet-i deyn-i şer‘den otuz guruş hakkım olup hattâ müteveffâ-yı mezbûr fevtinden bir sene mukaddem bana vâcibü’l-edâ deyni olduğunu huzûr-ı Müslimînde ikrâr ve işhâd dahi edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve akībe’l-inkâr müdde‘iye-i mesfûrdan müdde‘âsına mutâbık beyyine taleb olundukda udûl-i ahrâr-ı ricâl-i Müslimînden karye-i mezbûre sâkinlerinden Molla Ömer b. Mehmed ve Mehmed b. Mustafa nâm kimesneler li-ecli’ş-şehâde meclis-i ma‘kūd-ı mezkûrda hâzırân olup istişhâd olundukda fi’l-hakīka müteveffâ-yı mezbûr Abdullah Efendi b. Abdurrahman b. Mehmed işbu zimmetinde cihet-i deyn-i şer‘den otuz guruş müdde‘î-i mesfûr vâcibü’l-edâ deyni olduğunu fevtinden bir sene mukaddem huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hüseyin b. Abdürrezzak ve Ali Çelebi b. Abdulbâki ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sânî min-Zilhicceti’ş-şerîfe li-sene tis‘a ve ışrîn ve mi’e ve elf. Şuhûdü’l-hâl: Mehmed Çelebi b. Abdullah, Mehmed Efendi b. Abdullah, Hüseyin Efendi b. Abdürrezzak, es-Seyyid Süleyman b. es- Seyyid Mehmed ve gayruhüm.