Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 141 Hüküm no: 96 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah oğlu Ömer’e nafaka takdiri Havâss-ı Refî‘a kazâsına tâbi‘ Yenikapı hâricinde Merkez Efendi mahallesinde sâkin işbu sâhibü’l-kitâb Mustafa Beşe b. Ahmed meclis-i şer‘-i hatîr-i lâzımü’t-tevkīrde ve takrîr-i kelâm edip hâlâ bi-tarîkı’n-neseb hacr ve terbiyemde olan işbu sagīr Ömer b. Abdullah’ın nafaka ve kisve bahâya eşedd-i ihtiyâc ile muhtâc olmağın men lehü’l-hak ve’t-taleb üzerine kıbel-i şer‘den kadr-i ma‘rûf meblağ nafaka ve kisve farz ve takdîr olunmak matlûbumdur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûr Ömer’in nafaka ve kisve ve sâir levâzım-ı zarûriyesi için târîh-i kitâbdan beher yevm altışar akçe nafaka farz ve takdîr buyurup meblağ-ı mefrûz-ı mezbûru sagīr-i mezbûrun havâic-i zarûriyesine harc ve sarf ve lede’l-iktizâ istidâne ve inde’z-zafer sagīr-i mezbûr için men-lehü’l-hak ve’t-taleb olan kimesneye rücû‘a mezbûr Mustafa Beşe’ye izin birle mâ-vaka‘a bi’t-taleb ketbolundu. Fi’l-yevmi’s-sâdis min-Recebi’l-ferd li-sene tis‘a ve ışrîn ve mi’e ve elf. Şuhûdü’l-hâl: Derviş Ali b. Halil, el-Hâc Ahmed b. Mustafa el-müezzin, Ali Çelebi b. Mustafa Mustafa Beşe b. Ahmed, Hasan Çelebi b. Mehmed, Mehmed Beşe b. Ahmed.