Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 142 Hüküm no: 97 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali oğlu Mustafa Ağa’nın Tersâne-i âmire kâtibi Osman oğlu Ali Efendi’nin terekesinden alacağının tahsili Husûs-ı âti’l-beyânın mahallinde ketb ü tahrîr için bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkin iken bundan akdem vefât eden Tersâne-i âmire kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî huzûrlarında akd-i meclis-i şer‘-i nebevî ettikde mahmiye-i İstanbul’da İbrahim Paşa-yı atîk mahallesinde sâkin iken bundan akdem düyûnu terekesinden ezyed olduğu hâlde vefât eden Mustafa Ağa b. Ali’nin düyûn-ı müsbetesini edâya kıbel-i şer‘den vasî ve kayyım nasb [olunan] Hüseyin Efendi b. Hasan meclis-i ma‘kūd-ı mezkûrda müteveffâ-yı evvel tersâne kâtibi Ali Efendi’nin terekesine bi’l-verâse vâzı‘atü’l-yed olan işbu râfi‘atü’l-kitâb zevcesi Havva Hatun bt. El-Hâc Osman ile li-ebeveyn kız karındaşı Hadice Hatun mahzarlarında bi’l-vesâye ikrâr-ı tâm ve takrîr-i kelâm edip vasîsi olduğum müteveffâ-yı sânî Mustafa Ağa’nın mahalle-i mezbûrda vâki‘ ma‘lûmü’l-hudûd ve’l-müştemilât bir mikdâr mülk arsasını müteveffâ-yı [35a] mezbûr tersâne kâtibi Ali Efendi târîh-i kitâbdan on sene mukaddem yüz guruşa bey‘ ve teslîm edip meblağ-ı mezbûru müteveffâ-yı sânî Mustafa Ağa kable’l-ahz fevt olmağla meblağ-ı mezbûru bi’l-vesâye taleb eylediğimde ben beyâna dahi kadir olmayıp dâyinler hakkında sulh ilkâ‘ olduğu hâlde mezbûretân Havva ve Hadice hâtunlar ile beynimize muslihûn tavassut edip elli guruş üzerine sulh eylediklerinde ben dahi sulh-ı mezbûru ba‘de’l-kabûl ve bedel-i sulh olan meblağ-ı mezbûr elli guruşu mezbûretân Havva ve Hadice hâtunlar yedlerinden bi’t-tamâm ve’l-kemâl ahz u kabz edip ba‘dehû arsa-i mezbûr ile meblağ-ı bâkī elli guruş da‘vâsından mezbûretân Havva ve Hadice hâtunlar zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sâmin min-Saferi’l-hayr li-sene selâsîn ve mi’e ve elf. Şuhûdü’l-hâl: Mehmed Efendi b. Yusuf, Süleyman Efendi b. Ahmed, Ali Çelebi b. Mehmed, Veli Beşe b. Muslih, Mustafa Çelebi b. Ali, Ahmed Çelebi b. Hüseyin, Süleyman b. Mehmed, es-Seyyid Mustafa b. Sefer, es-Seyyid Süleyman b. es-Seyyid Mehmed ve gayruhüm.