Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 143 Hüküm no: 98 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersâne-i âmire kâtibi Osman oğlu Ali Efendi’nin terekesinden vârislerin hisselerini aldıkları Husûs-ı âti’l-beyânın mahallinde ketb ü tahrîri iltimâs olunmağın bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkin iken bundan akdem vefât eden Tersâne-i âmire kâtibi Ali Efendi b. Osman’ın ile’l-vefât menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde zâtlarını bi’l-ma‘rifeti’ş-şer‘iyye ârifân Mehmed Efendi b. Yusuf ve Süleyman Efendi b. Mehmed ta‘rîfleriyle mu‘arrefe olan müteveffâ-yı mezbûrun zevce-i menkûha-i metrûkesi Havva Hatun bt. el-Hâc Osman ile li-ebeveyn kız karındaşı Hadice Hatun bt. mezbûr Osman meclis-i ma‘kūd-ı mezkûrda işbu râfi‘u’l-kitâb Ahmed Çelebi b. Hüseyin mahzarında her biri ikrâr ve takrîr-i kelâm edip mûrisimiz müteveffâ-yı mezbûr Ali Efendi’nin terekesinden olmak üzere iki yüz tuğralı altın ve elli guruş kıymetli bir elmas yüzüğü mezbûr Ahmed Çelebi ketm ve ihfâ eyledi deyu taleb ve da‘vâ eylediğimizde ol dahi bi’l-külliye inkâr edip müdde‘â-i mezbûr beyâna kādir olmadığı ecilden meblağ-ı mezbûr ile iki yüz altın ile ve yüzük-i mezbûr mutâlebesinden merkūm Ahmed Çelebi’nin zimmetini her birimiz ibrâ-i âmm-ı kātı‘u’n-nizâ‘la ibrâ ve ıskāt eyledik min-ba‘d müteveffâ-yı mezbûrun sâir terekesine müte‘allıka vechen mine’l-vücûh ve sebeben mine’l-esbâb kat‘â mezbûr Ahmed Çelebi ile da‘vâ ve nizâ‘ımız kalmadı dediklerinde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi isnân [min] Saferi’l-hayr li-sene selâsîn ve mi’e ve elf. Şuhûdü’l-hâl: Es-sâbıkūn.