Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 143 Hüküm no: 99 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah oğlu el-Hac Mustafa’nın vârislerine harcanan terekesinin üçte birine ait muhasebesi Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Düğmecibaşı mahallesinde sâkin iken bundan akdem vefât eden el-Hâc Mustafa b. Abdullah’ın sulbî sagīr oğulları Mehmed Emin ve Ali ve Mes‘ud’un tesviye-i umûrlarına bâ-hüccet-i şer‘iyye vasiyy-i muhtârları olan cedleri Veli Çelebi b. Ali nâm kimesne müteveffâ-yı mezbûrun sülüsünden ber-mûceb-i vasiyyet on iki bin akçe kabz edip sagīrân-ı mezbûrânın Mehmed ve Emin ve Ali’nin hîn-i hayâtlarında vasiyy-i mezbûr Veli Çelebi ve sıgār-ı mezbûrûnun nâzırları taleb [ve] ma‘rifetiyle sarf eylediği akçenin muhâsebesi defteridir ki ber-vech-i âtî zikrolunur. Fi’l-yevmi’s-sânî min-Saferi’l-hayr li-sene selâsîn ve mi’e ve elf. mezbûrun kabz eylediği ber-mûceb-i vasiyyet meblağ 12.000 akçe yalnız on iki bin akçedir. Minhel___________________masârıf Kontoşluk çuka 8 zirâ‘ 2280 akçe Kapamalarına ve çakşırlarına alınan astar 4 top 400 akçe Def‘a kapamalarına çakşırlarına harc ve sâire 360 akçe [35b] Kırmızı fes masrûf 2 330 akçe Gömlek bürüncek ma‘a ipek masraf 630 akçe Kendilerine ve câriyelerine mest ve babuc masraf 420 akçe Cem‘iyyeti günü cedleri yed be-yed masraf 270 akçe Kāvuk aded masraf 2 318 akçe Terziye verilen astâriye 420 akçe Bahâ-i nakl harc-ı sâire masraf 360 akçe Hîn-i hitânda ferrâşlarına masraf 160 akçe Mes‘ud için alınan kürk 420 akçe Za‘ferân ve harc ve sâire masraf 300 akçe Asel ve revgan-ı sâde ma‘a pirinç masraf 1220 akçe Lahm-ı ganem ma‘a ekmek için masraf 250 akçe Kahve için masraf 240 akçe Hitânları için berbere verilen 400 akçe Harc-ı defter 40 akçe Kâtibiyye ve Hüddâmiye 40 akçe Cem‘an yekûn 8858 akçe Meblağ-ı mezbûr on iki bin akçeden vasiyy-i mezbûr Veli Çelebi'nin yalnız sekiz bin sekiz yüz elli sekiz akçesin sarf edip ancak zimmetinde bâkī üç bin yüz kırk akçe kaldığı bu mahalle şerh verildi.