Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 148 Hüküm no: 104 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden mahzen kâtibi Osman oğlu Ali Efendi’nin kürk ve çukalarını Hüseyin oğlu Ahmed Çelebi’ye hibe ettiği Husûs-ı âti’l-beyânın mahallinde istimâ‘ ve tahrîri iltimâs olunmağın bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkin iken bundan akdem vefât eden mahzen kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûrun zevce-i menkûha-i metrûkesi ile li-ebeveyn kız karındaşı olup zâtları ta‘rîfü’ş-şer‘iyye ile mu‘arrefe olan Havva bt. el-Hâc Osman ve Hadice bt. mezbûr Osman nâm hâtunlar meclis-i ma‘kūd-ı mezkûrda müteveffâ-yı mezbûr Ali Efendi’nin etbâ‘ından işbu râfi‘u’l-kitâb Ahmed Çelebi b. Hüseyin mahzarında her biri üzerine da‘vâ ve takrîr-i kelâm edip mûrisimiz müteveffâ-yı mezbûr Ali Efendi b. Osman b. Abdullah’ın terekesinden olmak üzere otuz guruş kıymetli fişne rengi çuka kaplı bir nâfe kürk ve ikişer guruş kıymetli dört zirâ‘ beyaz çukasını mezbûr Ahmed Çelebi bi-gayrı hakkın vaz‘[-ı yed] eder suâl olunup bize teslîme tenbîh olunmak bi’l-verâse matlûbumuzdur dedikde gıbbe’s-suâl mezbûr Ahmed Çelebi cevâbında fi’l-hakīka müteveffâ-yı mezbûr Ali Efendi’nin terekesinden olmak üzere vaz‘-ı yedini ikrâr lâkin müteveffâ-yı mezbûr Ali Efendi hâl-i hayâtında ve kemâl-i akl-ı sıhhatinde fevtinden dört ay mukaddem eşyâ-i muharrer-i mezbûreyi bana huzûr-ı Müslimînde hibe ve teslîm ben dahi meclis-i hibede ittihâb ve kabûl ve kabz edip ol vechile mülk-i mevhûbum olmuşdur deyu def‘le mukābele edicek gıbbe’l-istintâk ve’l-inkâr mezbûr Ahmed Çelebi’den meşrûhuna mutâbık beyyine taleb olundukda udûl-i ahrâr-ı Müslimînden medîne mezbûrede Fethiçelebi mahallesi sâkinlerinden Mustafa Çelebi b. Ali ve diğer Mustafa b. Hasan nâm kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffâ-yı mezbûr Ali Efendi b. Osman b. Abdullah kendi terekesinden olmak üzere otuz guruş kıymetli fişne rengi çuka kaplı bir nâfe kürk [ve] ikişer guruş kıymetli dört zirâ‘ beyaz çukasını hâl-i hayâtında ve kemâl-i akl-ı sıhhatinde fevtinden dört ay mukaddem işbu mezbûr Ahmed Çelebi’ye huzûrumuzda hibe ve teslîm ol dahi meclis-i hibede ittihâb ve kabûl ve kabz eyledi biz bu husûsa bu vech üzere şehâdet ederiz ve şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûretân Havva ve Hadice hâtunları bî-vech mu‘ârazadan men‘ birle mâ-vaka‘a bi’t-taleb ketbolundu. Fi’l-yevmi’s-sânî min-Saferi’l-hayr li-sene selâsîn ve mi’e ve elf. Şuhûdü’l-hâl: İbrahim Çelebi b. Mehmed, Ali Çelebi b. Mehmed, İsmail Çelebi b. Mehmed, el-Hâc Mustafa b. Abdullah, Mustafa Ağa b. Abdullah.