Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 403 Hüküm no: 471 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehterbaşı Mustafa Ağa’nın, Mihaliçli Emrullah Ağa’da Bursa cizyesi iltizamdan dolayı alacağının olmadığı, vasînin davasında haksız olduğu Mahmiye-i İstanbul’da Kabasakal Sinan Ağa mahallesi ahâlîsinden iken bundan akdem vefât eden mehterbaşı Mustafa Ağa’nın verâseti zevce-i metrûkesi Âişe bt. Ali ve Nazlı bt. Abdullah ve Sâliha bt. Abdullah nâm hâtunlara ve sulbiye sagīre kızı Fâtıma’ya ve li ebeveyn er karındaşı İlyas Ağa ve li ebeveyn kız karındaşları Cennet ve Fâtıma’ya münhasıra olduğu şer‘an sâbit oldukdan sonra sagīre-i mezbûrenin tesviye-i umûrlarına kıbel-i şer‘den mansûbe vasîsi olan el-Hâc Mehmed b. Mustafa nâm kimesne meclis-i şer‘den Mihaliçli Emrullah Ağa tarafından husûs-ı âti’l-beyâna vekîl olduğu Ali Çelebi b. Abdullah ve Hacı Ebûbekir b. Mahmud nâm kimesneler şehâdetleriyle şer‘an [sâ]bit olan Ahmed Ağa b. Mustafa mahzarında bi’l-vesâye da‘vâ ve takrîr-i kelâm edip müteveffâ-yı mezbûr hayâtında bin yetmiş dört ve bin yetmiş beş senelerinde taht-ı iltizâmında olan Bursa zimmîlerinin ziyâde cizyelerini âhara vermeğe me’zûn olmağla mezbûr Emrullah Ağa’ya yirmi üç bin esedî guruşa der-uhde edip mezbûr Emrullah Ağa’dan ba‘de’l-iltizâm ve’l-kabûl seneteyn-i mezbûreteynde mahrûse-i mezbûre zimmîlerinin ziyâde cizyesinden yirmi üç bin esedî guruşu cem‘ ve tahsîl edip merkūm Mustafa Ağa meblağ-ı mezbûr yirmi üç bin guruşu merkūm Emrullah Ağa’dan kable’l-ahz vefât etmeğin hâlâ meblağ-ı mezbûrdan kızı sagīre-i mezbûreye isâbet eden on bir bin beş yüz guruş nısf hissesini bi’l-vesâye vekîl-i mezbûrdan taleb ederim suâl olunsun dedikde, gıbbe’s-suâl vekîl-i mezbûr Ahmed Ağa cevâbında fi’l-hakīka müvekkilim merkūm Emrullah Ağa vech-i muharrer üzre seneteyn-i mezbûreteynde mahrûse-i mezbûre zimmîlerinin ziyâde cizyelerini meblağ-ı mezbûr yirmi üç bin guruşa merkūm Mustafa Ağa’dan hayâtında iltizâm eyledikden sonra ba‘de’t-tahsîl meblağ-ı mezbûru hayâtında merkūm Mustafa Ağa’ya tamâmen def‘ ve teslîm ol dahi ahz u kabz edip hattâ vech-i muharrer üzre meblağ-ı mezbûru tamâmen merkūm Emrullah Ağa yedinden ahz u kabz ve meblağ-ı mezbûrdan merkūm Emrullah Ağa’da bir akçe ve bir habbem kalmamışdır deyû hayâtında huzûr-ı müslimînde ikrâr dahi eylemişidi deyû def‘[le] mukābele eylemeğin gıbbe’s-suâl ve’l-inkâr vekîl-i mezbûrdan def‘-i mezbûrunu mübeyyine beyyine taleb olundukda mahalle-i mezbûre sükkânından Bâli Bey b. Yakub ve Hasan Bey b. Abdullah ve Yusuf b. Abdullah nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müteveffâ-yı merkūm Mustafa Ağa hâl-i hayâtında müvekkil-i merkūm Emrullah Ağa’ya vech-i muharrer üzre Bursa’nın ziyâde cizyesini bin yetmiş dört ve yetmiş beş senelerinin yirmi üç bin esedî guruşa merkūm Emrullah Ağa’ya der-uhde edip ol dahi ba‘de’l-iltizâm ve’l-kabûl cem‘ ve tahsîl edip meblağ-ı mezbûr yirmi üç bin esedî guruşu tamâmen getirip bana def‘ ve teslîm ben dahi yedinden ahz u kabz edip meblağ-ı mezbûrdan merkūm Emrullah Ağa’da bir akçem ve bir habbem bâkī kalmamışdır deyû bizim huzûrumuzda ikrâr ve bizi işhâd eyledi, biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebince vasiyy-i merkūm Hacı Mehmed bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Ahmed Efendi b. Mehmed el-Keşşâf, İbrahim Ağa b. Abdullah, Mehmed Efendi Halîfe-i rûznâme, Mehmed Çelebi b. Mehmed Kethüdâ-yı muhzırân, Muharrirü’l-hurûf Çelebizâde Mehmed Efendi.