Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 176 Hüküm no: 131 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çavuş oğlu Süleyman Bey’in kızına nafaka takdiri Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçibaşı mahallesi ahâlîsinden olup mahrûse-i Edirne’de müsâferet vechi üzere sâkin iken bundan akdem vefât eden Süleyman Bey b. Hüseyin Çavuş’un sulbiye sagīre kızı Hadice’nin vâlidesi ve tesviye-i umûruna kıbel-i şer‘den mansûbe vasiyyesi olan işbu râfi‘atü’l-kitâb Zeyneb Hatun bt. Hüseyin meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasiyyesi olduğum sagīre-i mezbûrenin nafaka ve kisve bahâya eşedd-i ihtiyâcı olmağla babası müteveffâ-yı mezbûrdan müntakil mâlından kadr-i ma‘rûf nafaka ve kisve bahâ farz ve takdîr olunmak matlûbumdur dedikde vasiyye-i mezbûrenin kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi müteveffâ-yı mezbûrdan müntakil mâlından kadr-i ma‘rûf beher yevm dörder akçe nafaka ve kisve bahâsına farz ve takdîr buyurup meblağ-ı mefrûz-ı mezbûru sagīre-i mezbûrenin nafaka ve kisve bahâsına harc ve sarfa ve lede’l-iktizâ istidâneye ve inde’z-zafer mâlından rücû‘a vasiyye-i mezbûre Zeyneb Hatun’a izin birle mâ-vaka‘a bi’t-taleb ketbolundu. Fi’l-yevmi’s-sâdis min-Cemâziyelâhir li-sene selâsîn ve mi’e ve elf. Şuhûdü’l-hâl: İsmail Efendi b. el-Hâc Osman, Mustafa Efendi b. Hüseyin, es-Seyyid Mustafa b. Sefer, es-Seyyid Süleyman b. es-Seyyid Mehmed.