Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 176 Hüküm no: 132 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çavuş oğlu Süleyman Bey’in terekesinden vârislerinin hisselerini aldıkları Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Kiremitçibaşı mahallesinde sâkinlerinden olup mahrûse-i Edirne’de misâfiren sâkin iken bundan akdem vefât eden Süleyman Ağa b. Hüseyin Çavuş b. Abdullah’ın ve sulbiye sagīre kızı Hadice’ye münhasıra ve tashîh-i mes’elesi sekiz sehimden olmağla sihâm-ı mezbûrenin bir sehmi zevce-i mezbûre Zeyneb Hatun’a ve üç sehmi babası mezbûr Hüseyin Çavuş’a ve dört sehmi sagīre-i mezbûre Hadice’ye isâbeti tahkīkinden sonra zâtı İsmail Efendi b. el-Hâc Osman ve es-Seyyid Mustafa b. Sefer ta‘rîfleriyle mu‘arrefe olan müteveffâ-yı mezbûrun zevce-i menkûha-i metrûkesi ve kızı sagīre-i mezbûre Hadice’nin tesviye-i umûruna kıbel-i şer‘den mansûbe vasiyyesi mezbûre Zeyneb Hatun meclis-i şer‘-i şerîf-i enverde müteveffâ-yı mezbûrun babası olup terekeye bi’l-verâse vâzı‘u’l-yed olan işbu bâ‘isü’l-kitâb Hüseyin Çavuş mahzarında asâleten [ve] vesâyeten ikrâr ve takrîr-i kelâm edip zevcim müteveffâ-yı mezbûrun terekesi tahrîr ve ba‘de ihrâci’l-masârıf ber-mûceb-i defter-i kassâm-ı askerî tashîh-i mezbûre hisseme isâbet eden yedi yüz kırk bir akçeyi ve vasîsi olduğum kızım sagīre-i mezbûrenin hissesine isâbet eden iki bin dokuz yüz altmış yedi akçe ki cem‘an üç bin yedi yüz sekiz akçeyi terekeden olmak üzere mezbûr Hüseyin Çavuş bana def‘ ü teslîm ben dahi yedinden bi’t-tamâm alıp kabz eyledim meblağ-ı mezbûr üç bin yedi yüz sekiz akçeden mezbûr Hüseyin Çavuş yedinde bir akçe ve bir habbe bâkī kalmayıp zevcim müteveffâ-yı mezbûrun kalîl ve kesîr tereke-i ma‘lûme ve mechûlesine müte‘allıka âmme-i mîrâs da‘vâsından mezbûr Hüseyin Çavuş’un zimmetini bi’l-asâle ibrâ-i âmm-ı kātı‘u’n-nizâ‘la ibrâ ve ıskāt eyledim [de]dikde gıbbe’t-tasdîki’ş-şer‘î mezbûr Hüseyin Çavuş dahi meclis-i şer‘de mezbûre Zeyneb Hatun mahzarında ikrâr ve takrîr-i kelâm edip oğlum müteveffâ-yı mezbûrun terekesine müte‘allıka âmme-i mîrâs da‘vâsından mezbûre Zeyneb Hatun’un zimmetini ibrâ-i [45b] âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sâdis min-Cemâziyelâhir li-sene selâsîn ve mi’e ve elf. Şuhûdü’l-hâl: Mehmed Çelebi b. Mustafa, Osman Ağa b. Mustafa, Abdi Çelebi b. Mehmed, Abdurrahman Çelebi [b.] el-Hâc Mehmed.