Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 404 Hüküm no: 472 Orijinal metin no: [64a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bedros v. Andri’nin bağını, Lise v. Vartan’a sattığı Fi’l-asl vilâyet-i Anadolu’da Kayseriye kazâsına tâbi‘ ( ) nâm karye ahâlîsinden olup Mahmiye-i İstanbul’da Kızıltaş mahallesinde sâkin Bedros v. Andri nâm zimmî meclis-i şer‘-i şerîf-i lâzımü’t-teşrîfde işbu bâ‘isü’s-sifr Lise v. Vartan nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülküm ve hakkım olup karye-i mezbûrda vâki‘ bir tarafdan Şehristan nâm zimmî bağı ve bir tarafdan küçük bağı demekle ma‘rûf bağı ve bir tarafdan Haşi nâm zimmî bağı ve bir tarafdan tarîk-i âm ile mahdûd bir kıt‘a mülk bağımı bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr Lise’ye yirmi üç kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl ettikden sonra semeni olan meblağ-ı mezbûr yirmi üç kıt‘a esedî guruşu mezbûr Lise yedinden tamâmen ahz u kabz edip mebî‘-i mezbûru mahallinde zabt ve tasarrufa müşterî-i mezbûr Lise’yi taslît [64b] eyledim ba‘de’l-yevm zikr olunan bağ-ı mezbûr Lise’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Hızır Beşe b. Abdullah, Kasım Beşe b. Ahmed, Ahmed b. ( ), Ahmed Beşe b. Halil.