Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 185 Hüküm no: 137 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. İbrahim’in terekesinden zevcesinin mehr-i müeccelini talebi Husûs-ı âti’l-beyânın mahallinde istimâ‘ ve tahrîr[i] için bu fakīr Havâss-ı Refî‘a kazâsı muzâfâtından Kasaba-i Çatalca’da vâki‘ Hadîka-i Hassa ustası Ahmed Ağa’nın sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde kasaba-i mezbûrede Yunus Bey mahallesinde sâkin iken bundan akdem vefât eden Hüseyin Ağa b. İbrahim’in zevce-i menkûha-i metrûkesi olup zâtı Mustafa Efendi b. Salih ve Süleyman Efendi b. Ömer ta‘rîfleriyle mu‘arrefe olan işbu bâisü’l-kitâb Şerife Hadice Hatun bt. es-Seyyid Abdulbâki meclis-i ma‘kūd-ı mezkûrda müteveffâ-yı mezbûrun vâlidesi olup vilâyet-i Rumeli’nde Sarıgöl kazâsında sâkine Emine Hatun bt. Abdullah nam gāibenin ve mezbûre Şerife Hadice Hatun’un batnında müstebîn hamlin hisse-i mevkūfelerini ahz u kabz [ve] zabt ve hıfza kıbel-i şer‘den vasî ve kayyım nasb olunmağla tereke-i müteveffâ-yı mezbûra bi’l-vesâye vâzı‘atü’l-yed olan mezbûr es-Seyyid Abdulbâki b. es-Seyyid Mustafa mahzarında üzerine da‘vâ ve takrîr-i kelâm edip zevcim müteveffâ-yı mezbûr Hüseyin Ağa b. İbrahim [b.] Abdurrahman tezevvüc murâd ettikde târîh-i kitâbdan dört ay mukaddem huzûr-ı Müslimînde beni on bin akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘iye-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i müslimînden olup Kasaba-i mezbûre sâkinlerinden mu‘arrefân-ı mezbûrân Mustafa ve Süleyman meclis-i mezkûra hâzırân olup istişhâd olunduklarında fî’l-hakīka müteveffâ-yı mezbûr Hüseyin Ağa b. İbrahim b. Abdurrahman tezevvüc murâd ettikde târîh-i kitâbdan dört ay mukaddem huzûrumuzda işbu müdde‘iye-i mezbûrda [mezbûreyi] on bin akçe mehr-i müeccel tesmiyesiyle tezevvüc ve kabûl edip ve akd ü nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘di’l-ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’l-hâmis aşer min-Cemaziye’l-evvel [li-]sene selasîn ve mi’e ve elf. Şuhûdü’l-hâl: Ahmed Ağa b. Mustafa, el-Hâc Mehmed Ağa b. Hüseyin, Hüseyin Bey b. Mehmed, Abdullah Çelebi b. el-Hâc Hüseyin, Mehmed Ağa b. Ahmed.