Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 186 Hüküm no: 138 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Osman’ın terekesinden kız kardeşi Hatice Hatun’un talep etmesi Husûs-ı âti’l-beyânın mahallinde ketb ü tahrîri için bu fakīr medîne-i Ebâ Eyyüb el-Ensârî -aleyhi rahmetü Rabbihi’l-Bârî-’de Arakıyyecibaşı mahallesinde sâkin iken bundan akdem vefât eden Tersâne-i âmire kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde müteveffâ-yı mezbûrun li-ebeveyn kız karındaşı olup zâtı Mehmed Efendi b. Yusuf ve Süleyman Efendi b. Mehmed ta‘rifleriyle mu‘arrefe olan Hadice Hatun meclis-i ma‘kūd-ı mezkûrda işbu râfi‘u’l-kitâb Ahmed Çelebi b. Hüseyin mahzarında bi’l-verâse ikrâr ve takrîr-i kelâm edip karındaşı müteveffâ-yı mezbûr Ali Efendi’nin terekesinden olmak üzere iki yüz tuğrâlı altun ve elli guruş kıymetli bir elmaz yüzüğü mezbûr Ahmed Çelebi ketm ve ihfâ eyledi deyu taleb ve da‘vâ eylediğimde mezbûr Ahmed Çelebi bi’l-külliye inkâr edip müdde‘âyı beyâna kādire olmadığım eclden meblağ-ı mezbûr iki yüz tuğrâlı altun ve elmas yüzük da‘vâsından [48b] mezbûr Ahmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mezbûr Ahmed Çelebi dahi meclis-i mezkûrda mezbûre Hadice Hatun ile müteveffâ-yı mezbûrun zevce-i menkûha-i metrûkesi Havva Hatun bt. el-Hâc Osman mahzarında ikrâr ve takrîr-i kelâm edip müteveffâ-yı mezbûr Ali Efendi zimmetinde karzdan kırk tuğrâlı altun hakkım olmağla ben dahi beyâna kādir olmayıp meblağ-ı mezbûre ve gayr-ı müte‘allika-i âmme-i da‘vâdan mezbûretân Hadice ve Havva Hâtunların zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’s-sânî min Saferi’l-hayr li-sene selasîn ve mi’e ve elf. Şuhûdü’l-hâl: Mehmed Efendi İmâm, Süleyman Efendi el-müezzin, es-Seyyid Mustafa b. Sefer, Süleyman Çelebi b. Mehmed, Mustafa Efendi b. Hüseyin, Mustafa Çelebi b. Maksudzâde, Ali Çelebi b. Abdullbaki, el-Hâc Ali b. Bakkal, Hüseyin Efendi b. Abdur[r]rezzak, Seyyid b. Süleyman Mâ-fihî kemâ zübire fihî harrerehu’l-fakīr ileyhi sübhânehu Osman el-kassâmü’l-askerî bi-medîne-i Ebâ Eyyüb el-Ensârî