Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 186 Hüküm no: 139 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Efendi b. Osman’ın menzilinin satılıp borçlarının ödenmesi Bi-hamdi lillâhillezi ehalle’l-bey‘a ve harreme’r-ribâ‘ ve’s-salâtü ve’s-selâmü ale’n-nebiyyi’l-Mustafa ve ba‘d zikri âtî husûs-ı âti’l-beyânın mahallinde ketb ü tahrîri için bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkin iken düyûnu terekesinden ezyed olduğu hâlde bundan akdem vefât eden Tersâne-i âmire kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî müslimîn huzûrlarında akd-i meclis-i şer‘-i Muhammedî ettikde müteveffâ-yı mezbûrun düyûn-ı müsbetesini edâya kıbel-i şer‘den vasî ve kayyım nasb olunan İmâm Mehmed Efendi b. Yusuf meclis-i ma‘kūd-ı mezkûrda işbu râfi‘u’l-kitâb el-Hâc İbrahim Ağa b. el-Hâc Mahmud mahzarında bi’l-vesâye ikrâr ve takrîr-i kelâm edip müteveffâ-yı mezbûr Ali Efendi’nin ile’l-vefât yedinde mülk ve hakkı olup mahalle-i mezbûrede vâki‘ bir tarafdan ba‘zan Mehmed Efendi ve ba‘zan Süleyman Çelebi ve ba‘zan mekābîr-i Müslimîn ve ba‘zan İmâm Mehmed Efendi mülkleri ve bir tarafdan yine imâm-ı mezbûr Mehmed Efendi’nin âhar mülkü ve ba‘zan Hace Hatun ve ba‘zan Vekilharç İsmail Ağa mülkleri ve bir tarafdan ba‘zan Kalaycı Ali Çelebi ve ba‘zan Abdurrahman mülkleri ve bir tarafdan tarîk-ı âm ile mahdûd hâriciyesinde tahtânî üç bâb oda ve kenîf ve bir mikdâr bahçe ve eşcâr-ı müsmire ve gayr-ı müsmire muhtevî ve dâhiliyyesinde fevkānî münakkaş bir bâb oda ve bir kebîr oda ve bir sagīr hazîne odası ve bir kebîr sofa ve bir nîm dehlîz ve kenîf ve tahtında bir kârgîr matbah ma‘a bi’r-i mâ’ ve bir kilâr ve bir kebîr oda ve bir hamâm ma‘a câmekân ve bir camlı köşk ve kenîf ve iki bahçe ve etrâf-ı selasesi taş dîvâr müştemil mülk menzil münâdîlerden ve Seyyid Ahmed b. Emrullah yediyle sûk-ı Sultânîde ve mücemmi‘-i nâs olan mahallerde sekiz ay mikdârında ve müzâyede olunup ragabâtü’n-nâs bi’l-külliye munkatı‘a oldukdan sonra işbu mezbûr el-Hâc İbrahim üzerinde bin iki yüz altmış guruşa karâr edip ziyâde tâlib-i âhar zuhûr etmediğinden mâ‘adâ meblağ-ı mezbûr menzil-i mahdûd-ı mezbûrun el-yevm semen-i misli olduğunu zeyl-i kitâbda muharrerü’l-esâmî olan sikāt-ı sahîhü’l-kelimât haber verdiklerinden sonra tarafeyndan icâb ve kabûlü hâvî şurût-ı müfsideden [ârî] bey‘-i bâtt-ı sahîh-i şer‘î ile mezbûr el-Hâc İbrahim bi’l-vesâye bin iki yüz altmış guruşa bey‘ ve temlîk ve teslîm eylediğimde ol d[ah]i ber-vech-i muharrer iştirâ ve temellük ve teslîm ve kabûl eylediğinden sonra semeni olan meblağ-ı mezbûr bin iki yüz altmış guruşu merkūm el-Hâc İbrahim yedinden bi’l-vesâye tamâmen alıp kabz eyledim fîmâ-ba‘d menzil-i mahdûd-ı mezkûr merkūm el-Hâc İbrahim’in mülk-i müşterâsı olmuşdur keyfemâ-yeşâ ve yahtâr ve mutasarrıf olsun dedikde gıbbe’t-tasdîki’ş-şer‘î [49a] mâ-vaka‘a bi’t-taleb ketbolundu. Fî-gurreti Recebi’l-ferd li-sene selasîn ve mi’e ve elf. Şuhûdü’l-hâl: Hüseyin Ağa b. Hasan, İmâm Ahmed Efendi, Süleyman Efendi b. Mehmed Efendi el-müezzin, Osman Çelebi b. Mustafa, Ahmed Bey b. Mehmed, Ali Çelebi b. Mustafa, Mehmed Çelebi b. Hasan el-müezzin, Hasan Bey b. Sefer, Hasan Beşe b. Mahmud, el-Hâc İsmail b. Mehmed, Yusuf Çelebi b. Halil, Osman Çelebi b. Mehmed, Kayyım Ahmed Çelebi b. İbrahim. Ahmed Çelebi b. Mustafa, Hasan Beşe b. Mustafa, İbrahim Çelebi b. Mehmed Efendi ve gayruhümu’l-hâzirûn.