Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 188 Hüküm no: 140 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersâne-i âmire kâtibi Osman oğlu Ali Efendi’nin satılan menzilinden zevcesinin alacağını aldığı Husûs-ı âti’l-beyânın mahallinde ketb ü tahrîri için bu fakīr medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkin [iken] düyûnu terekesinden ezyed olduğu hâlde bundan akdem vefât eden Tersâne-i âmire kâtibi Ali Efendi b. Osman’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı es-Seyyid Mustafa b. Sefer ve Süleyman Efendi b. Mehmed, ta‘rifleriyle mu‘arrefe olan Havva Hatun bt. el-Hâc Osman meclis-i ma‘kūd-ı mezbûrda müteveffâ-yı mezbûrun düyûn-ı müsbetesini edâya kıbel-i şer‘den vasî ve kayyım nasb olunan işbu râfi‘u’l-kitâb İmâm Mehmed Efendi b. Yusuf mahzarında ikrâr ve takrîr-i kelâm edip zevcim müteveffâ-yı mezbûr Ali Efendi’nin mahall-i mezbûrede vâki‘ inde’l-ahâlî ve’l-cîrân ma‘lûmü’l-hudûd ve’l-müştemilât mülk menzilini vasiyy-i mezbûr Mehmed Efendi bin iki yüz altmış guruşa bey‘ edip semeni olan meblağ-ı mezbûru zevcim müteveffâ-yı mezbûrun zimmetinde bâ-hüccet-i şer‘iyye bin altı yüz elli guruş hakkım olup vasiyy-i mezbûr Mehmed Efendi bey‘ eylediği menzil-i mezbûrun semeni olan meblağ-ı mezbûr bin iki yüz altmış guruşu bana def‘ ü teslîm ben dahi yedinden bi’t-tamâm ve’l-kemâl ahz u kabz edip vasiyy-i mezbûr Mehmed Efendi’nin yedinde ve zimmetinde bin iki yüz altmış guruşdan bir akçe ve bir habbe bâkī [ka]lmadı dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fî-gurreti Recebi’l-mürecceb li-sene selasîn ve mi’e ve elf. Şuhûdü’l-hâl: Hüseyin Ağa b. Hasan, İmâm Ahmed Efendi b. Mehmed, Süleyman Efendi b. Mehmed el-müezzin, Osman Çelebi b. Mustafa, Ahmed Bey b. Mehmed, Ali Çelebi b. Mustafa, Mehmed Çelebi b. Hasan, Hasan Bey b. Sefer, Hasan Beşe b. Mahmud, el-Hâc İsmail b. Mehmed, Yusuf Çelebi b. Halil, Osman Çelebi b. Mehmed.