Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 405 Hüküm no: 473 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülbûy bt. İbrahim’in hür ve müslüman olduğunun ispat edildiği Sâbıkan Meryem ismi ile müsemmât olan rıkkıyyetini mu‘terife ve mu‘abbere olan işbu açık kaşlı, elâ gözlü, sol kaşında cerh eseri olan bâ‘isetü’l-kitâb Gülbûy bt. İbrahim meclis-i şer‘-i şerîf-i Ahmedî ve mahfil-i dîn-i münîf-i Muhammedî’de rakīk olmak üzre kendiye vâzı‘ü’l-yed olan Hüseyin Ağa b. Sefer nâm kimesne mahzarında üzerine da‘vâ ve takrîr-i kelâm edip ben mahrûse-i Edirne’de Topkapısı mahallesinde sâkin olup hür olan İbrahim nâm kimesnenin zevce-i menkûhası Âişe nâm hürreden mütevellide kızı olup hattâ beni mezbûr Hüseyin Ağa’ya bey‘ eden hâzır bi’l-meclis Abdi Bey b. Abdüssamed’in bâyi‘i olan Hezargradlı Hüseyin Bey b. Bayram nâm kimesne beni mezbûr Abdi Bey’e bey‘ etmezden dört ay mukaddem benim için müslimdir ve hürredir deyû ikrâr dahi etmişidi, suâl olunup üzerimden mezbûr Hüseyin Ağa’nın yed-i mubtılasının kasr ve izâlesine tenbîh olunup sebîlim tahliyye olunmak matlûbumdur dedikde, gıbbe’s-suâl mezbûr Hüseyin Ağa cevâbında mevsûfe-i mezbûreyi mezbûr Abdi Bey merkūm Hezargradlı Hüseyin Bey’den iştirâ ve kabz ettiğinden sonra bana yüz on esedî guruşa bey‘ ve teslîm ve kabz-ı semen etmişidi, vech-i muharrer üzre hürre olduğunu ikrâr ettiği ma‘lûmum değildir deyicek mevsûfe-i mezbûreden müdde‘âsını mübeyyine beyyine taleb olundukda mahrûse-i İstanbul’da Küçük Ayasofya mahallesi sükkânından Şaban Bey b. İslâm ve Kurd Ağa b. Ali ve Abdi Beşe b. Ali ve Mustafa Çelebi b. Ahmed ve Hasan b. Eyüb nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Hezargradlı Hüseyin Bey târih-i kitâbdan dört ay mukaddem mahallemizde sâkin iken işbu mevsûfe-i mezbûreyi mezbûr Abdi Bey’e bey‘ etmezden mukaddem huzûrumuzda mevsûfe-i mezbûre için müslimdir ve hürredir deyû ikrâr etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince mevsûfe-i mezbûrenin hürriyetine hükm ve üzerinden mezbûr Hüseyin Ağa’nın yed-i mubtılasının kasr ve izâlesine tenbîh olunup sebîli tahliyye olunmağın mâ vaka‘a bi’t-taleb ketb olundu. Fi’l-yevmi’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Mustafa Çelebi b. ( ) el-Müezzin, Mumcu Abdi Beşe b. Ahmed, Hüseyin Çavuş b. Ali el-Mübâşir, Mehmed b. Ramazan, Mehmed Çelebi b. Abdülmennân Kethüdâ-yı muhzırân, Hasan Çelebi b. Ahmed, İbrahim Çelebi b. Ahmed.