Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 189 Hüküm no: 142 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Ahmed oğlu Mustafa Çelebi’nin oğlunun vasisi üzerine hasbi nâzır tayini Havâss-ı Refî‘a kazâsı muzâfâtından Çekmece-i Kebîr nâhiyesine tâbi‘ Eşkinöz nam karyede sâkin [iken] bundan akdem vefât eden Mustafa Çelebi b. el-Hâc Ahmed’in sulbî sagīr oğlu Ali ve sulbiye sagīre kızı Fâtıma’nın vâlideleri ve tesviye-i emrlerine kıbel-i şer‘den mansûbe vasiyeleri olan Saliha Hatun bt. Hüseyin’in üzerine bir hasbî nâzır lâzım ve mühim olmağın emânet ile ma‘rûf ve diyânet ile mevsûf her vechile nezâret uhdesinden gelmeğe kādir idiği zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer olan sagīrân-ı mezbûrânın ammileri işbu râfi‘u’l-kitâb Süleyman Çelebi b. el-Hâc Ahmed’i hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi vasiyye-i mezbûre Saliha Hatun’un üzerine hasbî nâzır nasb ve ta‘yîn eyledikde ol dahi nezâret-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sânî aşer min-Recebi’l-ferd li-sene selasîn ve mi’e ve elf. Şuhûdü’l-hâl: el-Hâc İbrahim Efendi b. Hüseyin İmâm, İbrahim Çelebi b. Hüseyin, Molla Ali b. el-Hâc İbrahim, Mehmed Çelebi b. İslam, Ramazan b. Abdullah, İbrahim Beşe b. Mustafa, Hasan Beşe b. Mustafa, Hüseyin Beşe b. Mustafa, Mustafa Beşe b. Ali ve gayruhüm.