Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 189 Hüküm no: 143 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Ahmed oğlu Mustafa Çelebi’nin terekesinden zevcesinin mehr-i müeccelini talebi Havâss-ı Refî‘a kazâsı muzâfâtından Çekmece-i Kebîr nâhiyesine tâbi‘ Eşkinöz nam karyede sâkin iken bundan akdem vefât eden Mustafa Çelebi b. el-Hâc Ahmed’in zevce-i menkûha-i metrûkesi olup zâtı es-Seyyid Mustafa Çelebi b. Sefer ve Ali Çelebi b. Mehmed ta‘rîfleriyle mu‘arrefe olan işbu râfi‘u’l-kitâb Saliha Hatun bt. Hüseyin meclis-i şer‘-i şerîfi’l-enverde müteveffâ-yı mezbûrun âhar zevce-i menkûha-i metrûkesi ve terekesinden bi’l-verâse vâzı‘atü’l-yed olup zâtı kezâlik mu‘arrifân-ı mezbûrân ma‘rifetleriyle mu‘arrefe olan Âişe Hatun bt. el-Hâc İsmail mahzarında üzerine da‘vâ ve takrîr-i kelâm edip zevcim müteveffâ-yı mezbûr Mustafa Çelebi b. el-Hâc [Ahmed] b. Abdullah zimmetinde mütekarrir ve ma‘kūdun aleyh üç bin beş yüz akçe mehr-i müeccel hakkım olup hattâ müteveffâ-yı mezbûr hâl-i kemâl-i sıhhatinde ve fevtinden beş sene mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘iye-i mezbûre Saliha’dan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahmiye-i İstanbul’da Silivri Kapısı dâhilinde sâkin İbrahim Beşe b. Hüseyin ve Mustafa Beşe b. Ali li-ecli’ş-şehâde meclis-i şer‘a hâzırân olup istişhâd olunduklarında fî’l-hakīka müteveffâ-yı mezbûr Mustafa Çelebi b. el-Hâc Ahmed b. Abdullah hâl-i kemâl-i sıhhatinde fevtinden beş sene mukaddem işbu müdde‘iye-i mezbûre Saliha Hatun [50a] zimmetinde mütekarrir ve ma‘kūdun aleyh üç bin beş yüz akçe mehr-i müeccel deyni olduğunu huzûrumuzda da ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘di’l-ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fî-gurreti Recebi’l-ferd li-sene selasîn ve mi’e ve elf. Şuhûdü’l-hâl: Molla Ali b. Mustafa, Mehmed Çelebi b. İslam, Ramazan Beşe b. Abdülkerim, İbrahim Beşe b. Mustafa, Hasan Beşe b. Ramazan, Hüseyin Beşe b. Mustafa, Berber Hasan Çelebi b. Abdullah.